تحقیق: تیراکی کمر درد میں نمایاں کمی لاتی ہے
آسٹریلوی تحقیق کے مطابق تیراکی نہ صرف کمر کے درد میں کمی لاتی ہے بلکہ اس کا مثبت اثر چھ ماہ سے ایک سال تک برقرار رہتا ہے۔
اہم نکات
AIآسٹریلیا میں کی گئی ایک سائنسی تحقیق سے ثابت ہوا ہے کہ تیراکی کمر کے نچلے حصے کے درد میں کمی لانے میں دیگر کھیلوں اور جسمانی ورزشوں کے مقابلے میں زیادہ مؤثر ہے۔
یہ تحقیق سڈنی کی میکواری یونیورسٹی کے محققین نے معروف جریدے "برٹش جرنل آف اسپورٹس میڈیسن" میں شائع کی، جس میں بتایا گیا کہ تیراکی کے فوائد صرف قلیل مدتی نہیں بلکہ اس کے مثبت اثرات تربیتی پروگرام ختم ہونے کے بعد بھی چھ ماہ سے ایک سال تک برقرار رہتے ہیں۔
تحقیق کی تفصیلات اور نتائج
تحقیق میں 76 بالغ افراد نے حصہ لیا جن کی عمریں 26 سے 74 سال کے درمیان تھیں اور وہ سب کم از کم تین ماہ سے کمر کے نچلے حصے کے درد میں مبتلا تھے۔ شرکاء نے آٹھ ہفتوں پر مشتمل تیراکی کے پروگرام میں حصہ لیا، جس کے بعد ان کی حرکت میں نمایاں بہتری اور درد میں واضح کمی دیکھی گئی۔
تحقیق کی نگران ڈیبورا ویرہام کے مطابق، تیراکی سے شرکاء کے درد میں تقریباً 50٪ تک کمی واقع ہوئی۔
تیراکی کے اضافی فوائد
ادھر، یونیورسٹی کے ریڑھ کی ہڈی کے درد کے تحقیقی مرکز سے وابستہ محقق مارک ہینکاک نے بتایا کہ تیراکی نہ صرف حرکت اور جسمانی طاقت میں بہتری لاتی ہے بلکہ جسم کی آکسیجن استعمال کرنے کی صلاحیت کو بھی مجموعی طور پر بڑھاتی ہے۔