جرمنی میں گائے کے فارموں میں نیا وائرس، پھیلاؤ کا خدشہ

جنوبی جرمنی میں گائے کے ریوڑوں میں نیا وائرس سامنے آیا ہے، جس کے پھیلاؤ کے خدشات اس وجہ سے بڑھ گئے ہیں کہ اسے منتقل کرنے والی حشرات اب بھی سرگرم ہیں۔

جرمنی کے جانوروں کی صحت کے تحقیقاتی ادارے، فریڈرش لوفلر انسٹی ٹیوٹ کے مطابق، یہ وائرس بخار، اسہال اور دودھ کی پیداوار میں کمی جیسی علامات کا باعث بنتا ہے اور خون چوسنے والی چھوٹی حشرات کے ذریعے پھیلتا ہے۔ موجودہ اعداد و شمار کے مطابق، جنوبی باڈن کے علاقے میں تقریباً 100 فارم متاثر ہوئے ہیں، تاہم اب تک کسی جانور کی ہلاکت رپورٹ نہیں ہوئی۔ متعلقہ حکام نے بتایا ہے کہ بیماری کی شدت عموماً معمولی رہتی ہے اور متاثرہ جانور چند دنوں میں صحت یاب ہو جاتے ہیں۔

لیبارٹری ٹیسٹ سے معلوم ہوا ہے کہ یہ وائرس 'اورتھوبونیا' گروپ سے تعلق رکھتا ہے، جو بنیادی طور پر افریقہ، ایشیا اور آسٹریلیا میں پایا جاتا ہے۔ یہ وائرس 2011 میں جرمنی میں سامنے آنے والے شمالنبرگ وائرس سے بھی مشابہ ہے، جس نے اس وقت مویشیوں، خصوصاً بھیڑوں کو شدید نقصان پہنچایا تھا۔

انسٹی ٹیوٹ نے واضح کیا ہے کہ یہ وائرس بنیادی طور پر جگالی کرنے والے جانوروں جیسے گائے، بھیڑ اور بکریوں کو متاثر کرتا ہے اور اب تک کوئی شواہد نہیں ملے کہ یہ انسان کے لیے بڑا خطرہ ہے۔ تاہم، اس کے پھیلاؤ اور صحت پر اثرات کا جائزہ لینے کے لیے مزید تحقیق جاری ہے۔

ادارے نے یہ بھی بتایا کہ سب سے زیادہ خطرہ حاملہ جانوروں کے جنین کو لاحق ہو سکتا ہے۔