سعودی عرب میں بارش اور گرد آلود ہواؤں کی پیش گوئی

قومی مرکز برائے موسمیات نے توقع ظاہر کی ہے کہ جازان اور عسیر کے بعض حصوں میں درمیانے سے شدید درجے کی گرج چمک کے ساتھ بارش، ژالہ باری اور تیز ہوائیں چل سکتی ہیں۔

مرکز کے مطابق باحہ اور مکہ مکرمہ کے پہاڑی علاقوں میں ہلکی سے درمیانے درجے کی بارش متوقع ہے، جبکہ مشرقی ریجن کے جنوبی حصوں، نجران اور مدینہ منورہ کے پہاڑی علاقوں میں بھی بارش برسانے والے گرج دار بادل بننے کا امکان ہے۔

مرکز نے مزید بتایا کہ مشرقی ریجن اور ریاض کے بعض علاقوں میں درجہ حرارت زیادہ رہے گا، جبکہ ان علاقوں میں تیز ہوائیں اور گرد و غبار کا سلسلہ جاری رہنے کی توقع ہے، جس سے مکہ مکرمہ اور مدینہ منورہ کے ساحلی حصوں میں افقی حد نگاہ تقریباً ختم ہو سکتی ہے۔

سمندر اور ہواؤں کی صورتحال

رپورٹ کے مطابق بحیرہ احمر میں سطحی ہوائیں شمال مغرب سے شمال کی جانب اور شمالی و وسطی حصوں میں چلیں گی، جبکہ جنوبی حصے میں شمال مغرب سے مغرب کی سمت میں 25 سے 55 کلومیٹر فی گھنٹہ کی رفتار سے چلیں گی۔ اس دوران موجوں کی اونچائی ڈیڑھ میٹر سے ڈھائی میٹر تک ہو سکتی ہے اور سمندر درمیانے سے شدید اضطراب کی حالت میں رہے گا۔

خلیج عرب میں سطحی ہوائیں شمال مغرب سے جنوب مشرق کی سمت میں 10 سے 35 کلومیٹر فی گھنٹہ کی رفتار سے چلیں گی، جبکہ موجوں کی اونچائی آدھے میٹر سے ایک میٹر تک ہوگی اور سمندر ہلکی لہروں کے ساتھ پرسکون رہے گا۔