جازان میں خطرہ ٹل گیا، سول ڈیفنس کا اعلان

سعودی سول ڈیفنس نے کچھ دیر قبل جازان شہر سے خطرے کے زوال کا اعلان کیا ہے۔

اس سے قبل سول ڈیفنس نے اپنے سرکاری ایکس اکاؤنٹ پر ہنگامی حالات کے لیے قومی انتباہی پلیٹ فارم سے جازان میں الرٹ جاری ہونے کی اطلاع دی تھی۔

اس موقع پر سول ڈیفنس نے شہریوں کو ہدایت کی تھی کہ وہ پرسکون رہیں، سرکاری ہدایات پر عمل کریں، عمارتوں کے اندر رہیں اور کسی محفوظ کمرے یا کھڑکیوں سے دور جگہ پر منتقل ہو جائیں، نیز خطرہ ختم ہونے تک گھر یا عمارت نہ چھوڑیں۔

ہدایت میں یہ بھی کہا گیا تھا کہ کھلی جگہوں اور شیشے سے دور رہیں، بالکونی یا چھت پر کھڑے نہ ہوں، جبکہ باہر موجود افراد کو قریبی عمارت میں داخل ہونے یا کسی مضبوط دیوار کے پیچھے پناہ لینے کی تاکید کی گئی تھی۔

سول ڈیفنس نے مزید کہا کہ ہجوم اور تصویربرداری سے مکمل گریز کریں اور خطرناک مقامات سے دور رہیں۔ اگر انتباہی پیغام ڈرائیونگ کے دوران ملے تو پلوں اور بلند عمارتوں سے دور سڑک کے کنارے گاڑی روکنے کی ہدایت دی گئی۔