جدہ میں سمندری سرگرمیوں کی خلاف ورزی پر دو شہری گرفتار

جدہ میں ساحلی حرس الحدود کی گشتی ٹیموں نے دو شہریوں کو سمندری سرگرمیوں کے لیے مقررہ سکیورٹی اور سیفٹی ضوابط کی خلاف ورزی پر گرفتار کر لیا۔ دونوں افراد بغیر اجازت نامے کے شکار کر رہے تھے اور ممنوعہ آلات استعمال کر رہے تھے۔ ان کے خلاف ضابطے کے مطابق کارروائی کی گئی اور متعلقہ اداروں سے رابطہ کیا گیا۔

حرس الحدود نے شہریوں سے اپیل کی ہے کہ وہ آبی حیات کے تحفظ سے متعلق قوانین اور ہدایات کی مکمل پابندی کریں اور اگر کہیں بھی ماحول یا قدرتی حیات کو نقصان پہنچانے کا واقعہ دیکھیں تو فوری طور پر اطلاع دیں۔ مکہ مکرمہ، مدینہ منورہ، ریاض اور مشرقی ریجن میں اس مقصد کے لیے 911 اور دیگر علاقوں میں 994 پر رابطہ کیا جا سکتا ہے۔ تمام شکایات کو مکمل رازداری کے ساتھ نمٹایا جائے گا اور اطلاع دینے والے پر کوئی ذمہ داری عائد نہیں ہو گی۔