ریاض میں خطرے کے پیش نظر سول ڈیفنس کا انتباہ جاری

سعودی سول ڈیفنس کی جانب سے ریاض شہر میں خطرے کے پیش نظر انتباہ جاری کیا گیا ہے۔

محکمے نے ایکس پلیٹ فارم پر بتایا کہ اگر قومی ایمرجنسی وارننگ سسٹم سے انتباہی پیغامات موصول ہوں تو شہریوں کو چاہیے کہ وہ مکمل سکون اور احتیاط کے ساتھ سرکاری ہدایات پر عمل کریں، فوری طور پر قریبی محفوظ مقام (کسی عمارت یا اندرونی کمرے میں، کھڑکیوں سے دور) منتقل ہو جائیں اور خطرہ ختم ہونے تک وہیں رہیں۔ اس کے علاوہ خطرہ ختم ہونے تک گھر یا عمارت سے باہر نہ نکلیں۔

ہدایات میں مزید کہا گیا ہے کہ کھلی جگہوں اور شیشے سے دور رہیں، بالکونی یا چھت پر ہرگز نہ جائیں۔ اگر باہر موجود ہوں تو فوراً قریبی عمارت میں پناہ لیں یا کسی مضبوط دیوار کے پیچھے چھپ جائیں۔ ہجوم سے گریز کریں اور کسی بھی صورت میں ویڈیو یا تصاویر نہ بنائیں۔ اگر انتباہی پیغام ملے اور آپ گاڑی میں ہوں تو سڑک کے کنارے، پلوں اور بلند عمارتوں سے دور گاڑی روک لیں۔ خطرے کی صورت میں مکہ مکرمہ، مدینہ منورہ، ریاض اور مشرقی ریجن میں 911 جبکہ باقی علاقوں میں 998 پر ایمرجنسی نمبر پر رابطہ کریں اور صرف سرکاری ذرائع سے جاری ہدایات پر عمل کریں۔