دمام میں پارک اور اسپورٹس ٹریک کی ترقی کے لیے مفاہمتی یادداشت

امانتہ مشرقی ریجن اور المواساة میڈیکل سروسز کمپنی نے گزشتہ روز دمام میں امانتہ کے دفتر میں ایک مفاہمتی یادداشت پر دستخط کیے، جس کے تحت دمام کے احد محلے میں 11,000 مربع میٹر سے زائد رقبے پر پارک اور اسپورٹس ٹریک تیار کیا جائے گا۔

اس یادداشت کا مقصد معاشرتی شراکت کو فروغ دینا، سبزہ زاروں میں اضافہ کرنا اور رہائشیوں کے معیارِ زندگی کو بہتر بنانے کے لیے عوامی سہولیات فراہم کرنا ہے۔

معاہدے پر امانتہ مشرقی ریجن کے امین انجینئر فہد بن محمد الجبیر اور المواساة میڈیکل سروسز کے چیف ایگزیکٹو آفیسر ناصر السبیعی نے دستخط کیے، اس موقع پر وزارت بلدیات و رہائش کے نمائندے بھی موجود تھے۔ یہ اقدام بلدی اور نجی شعبے کے درمیان تعاون کو مضبوط بنانے کی کوششوں کا حصہ ہے۔

یہ منصوبہ المواساة اسپتال کے قریب، بلدیہ غربی دمام کے دائرہ کار میں واقع ہے اور اس کا مقصد ایک ایسی کمیونٹی جگہ فراہم کرنا ہے جہاں کھیل، تفریح اور سبزہ زار ایک ساتھ ہوں، تاکہ رہائشی صحت مند سرگرمیوں میں حصہ لے سکیں اور خوشگوار ماحول میں وقت گزار سکیں۔

منصوبے میں پارک اور اسپورٹس ٹریک کی تعمیر، شجرکاری، روشنی اور فرش سازی کے کام شامل ہیں، اس کے علاوہ بچوں کے کھیلنے کے لیے مخصوص علاقہ بھی تیار کیا جائے گا، تاکہ مختلف عمر کے افراد کو سہولیات میسر آئیں اور صحت مند طرزِ زندگی کو فروغ ملے۔

اس منصوبے کی خاص بات یہ ہے کہ اس کی لوکیشن امام ترمذی اور خالد الحواری سڑکوں کے سنگم پر ہے، جس سے یہاں تک رسائی آسان اور سہولیات سے زیادہ سے زیادہ لوگ فائدہ اٹھا سکیں گے۔

یہ شراکت داری امانتہ مشرقی ریجن کی نجی شعبے کے ساتھ تعاون بڑھانے، سبزہ زاروں میں اضافے اور شہری منظر کو بہتر بنانے کی کوششوں کا تسلسل ہے، جو سعودی وژن 2030 کے معیارِ زندگی اور ماحولیاتی استحکام کے اہداف سے ہم آہنگ ہے۔