غزہ میں نقل مکانی میں اضافہ، اقوام متحدہ کا انتباہ

اقوام متحدہ کے دفتر برائے انسانی امور (اوچا) نے کہا ہے کہ غزہ میں نقل مکانی میں تیزی آئی ہے، جہاں مسلسل بمباری اور فضائی حملوں کے نتیجے میں عام شہری، جن میں بچے بھی شامل ہیں، جاں بحق ہو رہے ہیں اور بے گھر خاندانوں کی تعداد بڑھ رہی ہے۔

اقوام متحدہ کی امدادی ایجنسیوں نے ہنگامی انسانی امداد کی کوششیں تیز کرنے کا اعلان کیا ہے، تاکہ بمباری اور آگ سے متاثرہ خاندانوں، خصوصاً حال ہی میں بے گھر ہونے والوں کی فوری ضروریات پوری کی جا سکیں۔

فراہم کی جانے والی امداد میں پناہ کے سامان، کمبل، پانی کے کنٹینر، کپڑے اور غذائی اشیاء شامل ہیں، تاکہ مسلسل لڑائی سے متاثرہ شہریوں کی مشکلات کم کی جا سکیں۔

ملبہ ہٹانے اور خدمات کی بہتری میں مشکلات

اقوام متحدہ کے ترقیاتی پروگرام نے اعلان کیا ہے کہ تقریباً 6,000 ٹن ملبہ دوبارہ استعمال کیا گیا ہے تاکہ زمین کو مضبوط بنایا جا سکے، اس اقدام کا مقصد شہریوں کی نقل و حرکت اور انسانی خدمات تک رسائی کو بہتر بنانا ہے۔ تاہم، یہ مقدار اکتوبر 2023 سے جاری لڑائی کے بعد جمع ہونے والے 60 ملین ٹن سے زائد ملبے کا صرف ایک چھوٹا حصہ ہے۔

پروگرام کے مطابق، سکیورٹی کی خراب صورتحال، رسائی میں رکاوٹیں اور بھاری مشینری، پرزہ جات اور انجن آئل کی فراہمی پر پابندیاں ملبہ ہٹانے کی کوششوں میں بڑی رکاوٹ ہیں۔

اسی تناظر میں، اقوام متحدہ کے دفتر نے شہریوں اور شہری انفراسٹرکچر کے تحفظ اور ان پر حملے نہ کرنے کی اپیل کی ہے، تاکہ بین الاقوامی قانون کی پاسداری یقینی بنائی جا سکے۔