یمنی حکومت کی حوثی حملے کی شدید مذمت

یمنی حکومت نے سعودی عرب کی قیادت، حکومت اور عوام کے ساتھ مکمل یکجہتی اور ثابت قدمی کا اظہار کرتے ہوئے ریاض میں واقع کنگ خالد بین الاقوامی ایئرپورٹ پر ہونے والے دہشت گردانہ حملے کی شدید الفاظ میں مذمت کی ہے۔ حکومت نے اس حملے کو ایک خطرناک اور اشتعال انگیز اقدام قرار دیا جو حوثی ملیشیا کی جانب سے سعودی عرب کے امن کو مسلسل خطرے میں ڈالنے، شہری تنصیبات کو نشانہ بنانے اور عام شہریوں کی زندگیوں کو خطرے میں ڈالنے کے عزم کی عکاسی کرتا ہے۔

اپنے بیان میں حکومت نے کہا کہ ہوائی اڈوں اور شہری تنصیبات کو نشانہ بنانا ممالک کے امن و استحکام پر ناقابل قبول حملہ اور بین الاقوامی قوانین و ضوابط کی کھلی خلاف ورزی ہے۔ بیان میں مزید کہا گیا کہ یہ حملہ ایک بار پھر حوثی ملیشیا کی جارحانہ فطرت کو ظاہر کرتا ہے جو ایرانی ایجنڈے اور تخریبی منصوبوں کی تکمیل کے لیے خطے کے امن و استحکام کو نشانہ بنانے سے گریز نہیں کرتی۔

بیان میں اس امر پر زور دیا گیا کہ سعودی عرب کا امن یمن اور پورے خطے کے امن سے جدا نہیں اور اس کی سرزمین یا شہری تنصیبات پر کسی بھی حملے کو خطے کے عوام کے حقِ امن، استحکام، آزادانہ نقل و حرکت اور فضائی سلامتی پر حملہ تصور کیا جائے گا۔

بیان میں مزید کہا گیا کہ ایسے حملے دونوں ممالک کے برادرانہ تعلقات اور مشترکہ مستقبل کو متاثر نہیں کر سکتے اور نہ ہی یمنی حکومت کے اس مضبوط موقف کو کمزور کر سکتے ہیں جو سعودی عرب کی سلامتی اور خودمختاری کے خلاف دہشت گردی اور خطرات کا مقابلہ کرنے میں ہمیشہ اس کے ساتھ کھڑی ہے۔

یمنی حکومت نے خادم الحرمین الشریفین شاہ سلمان بن عبدالعزیز اور ولی عہد و وزیر اعظم شہزادہ محمد بن سلمان کی قیادت میں سعودی عرب کے اس کلیدی کردار کو بھی سراہا جو وہ یمن کی قانونی حکومت، اس کے عوام کی مدد، ریاستی اداروں کی بحالی اور خطے کے امن و استحکام کے فروغ میں ادا کر رہا ہے۔