سعودی طلبہ کیلئے بحرین میں نرسنگ اسکالرشپ پروگرام کا آغاز

وزارت تعلیم نے بحرین کی یونیورسٹی آف گلف میں نرسنگ میں بیچلر ڈگری کے لیے اسکالرشپ پروگرام میں داخلے کے آغاز کا اعلان کیا ہے۔

وزارت نے اپنے سرکاری ایکس اکاؤنٹ کے ذریعے بتایا کہ یہ اقدام دونوں ممالک کے درمیان صحت کے شعبے میں معاہدوں کے تحت کیا گیا ہے۔

درخواست دینے کے لیے شرائط میں شامل ہے کہ امیدوار سعودی شہری ہو، اس کی عمر 20 سال سے زیادہ نہ ہو، اس نے سائنس کے شعبے سے ثانوی تعلیم کم از کم 85 فیصد یا 4 میں سے 3.40 جی پی اے کے ساتھ مکمل کی ہو۔ عملی مضامین (فزکس، کیمسٹری، حیاتیات، ریاضی) میں کم از کم 80 فیصد نمبر ہوں۔ صلاحیت اور تحصیلی ٹیسٹ میں ہر ایک میں کم از کم 70 فیصد نمبر حاصل کیے ہوں۔ IELTS میں کم از کم 5.5 یا TOEFL کے مساوی اسکور حاصل کیا ہو۔

شرائط میں یہ بھی شامل ہے کہ امیدوار نے اسی تعلیمی مرحلے کے لیے پہلے کبھی اسکالرشپ نہ لی ہو، وزارت کی جانب سے انتخابی مراحل کامیابی سے مکمل کرے، اگر ثانوی سرٹیفکیٹ مملکت سے باہر کسی ادارے سے حاصل کیا گیا ہو تو اس کی تصدیق متعلقہ ادارے سے کرائے، اور تعلیم کے دوران مکمل حاضری اور ملکِ اسکالرشپ میں قیام یقینی بنائے۔

ایکس پر اصل پوسٹ دیکھیں