خمیس مشیط میں ابتدائی وارننگ سسٹم فعال

سعودی محکمہ دفاع مدنی نے پیر کی شام خمیس مشیط میں قومی ابتدائی وارننگ پلیٹ فارم سے الرٹ جاری کرنے کا اعلان کیا ہے۔

محکمہ نے شہریوں پر زور دیا ہے کہ وہ پرسکون رہیں اور سرکاری ہدایات پر عمل کریں، عمارتوں کے اندر رہیں اور کسی اندرونی کمرے یا محفوظ جگہ پر چلے جائیں جو کھڑکیوں سے دور ہو، اور خطرہ ختم ہونے تک گھر یا عمارت نہ چھوڑیں۔

ہدایت میں کہا گیا ہے کہ کھلی جگہوں اور شیشے سے دور رہیں، بالکونی یا چھت پر کھڑے نہ ہوں، جبکہ عمارتوں سے باہر موجود افراد کو قریب ترین عمارت میں داخل ہونے یا کسی مضبوط دیوار کے پیچھے پناہ لینے کی تلقین کی گئی ہے۔

محکمہ نے مزید تاکید کی ہے کہ کسی صورت میں ہجوم نہ لگائیں اور نہ ہی ویڈیو یا تصاویر بنائیں، اور خطرناک مقامات سے دور رہیں۔ اگر وارننگ پیغام ڈرائیونگ کے دوران ملے تو سڑک کے کنارے رک جائیں اور پلوں یا بلند عمارتوں سے دور رہیں۔

محکمہ نے ہدایت کی ہے کہ مکہ مکرمہ، مدینہ منورہ، ریاض اور مشرقی ریجن میں کسی بھی خطرے کی صورت میں ہنگامی نمبر 911 اور مملکت کے دیگر علاقوں میں 998 پر رابطہ کریں۔

مزید کہا گیا ہے کہ متعلقہ اداروں کی جانب سے جاری کردہ ہدایات کو سرکاری ذرائع سے باقاعدگی سے ملاحظہ کریں اور ان پر عمل کریں۔