فیجی سے جڑے ہوئے جڑواں بچیوں کا ریاض میں طبی معائنہ

فیجی سے تعلق رکھنے والی جڑواں بچیاں 'جیسپیل اور ڈیسسیا' آج ریاض کے کنگ خالد انٹرنیشنل ایئرپورٹ پہنچ گئیں۔ ان کی آمد خادم الحرمین الشریفین شاہ سلمان بن عبدالعزیز اور ولی عہد و وزیراعظم شہزادہ محمد بن سلمان کی ہدایات پر عمل درآمد کے تحت ہوئی۔

ایئرپورٹ پہنچنے کے فوراً بعد جڑواں بچیوں اور ان کے اہل خانہ کو وزارت الحرس الوطنی کے تحت کنگ عبداللہ اسپیشلسٹ چلڈرن ہسپتال منتقل کیا گیا، جہاں ان کا تفصیلی طبی معائنہ کیا جائے گا تاکہ ان کی علیحدگی کے امکانات کا جائزہ لیا جا سکے۔

ڈاکٹر عبداللہ بن عبدالعزیز الربیعہ، جو مرکزِ شاہ سلمان برائے امداد و انسانی خدمات کے نگرانِ اعلیٰ اور سعودی کنجوائنڈ ٹوئنز پروگرام کے سربراہ ہیں، نے بتایا کہ یہ انسانی اقدام مملکت کے اس عزم کی عکاسی کرتا ہے کہ وہ ہر ضرورت مند کی مدد کے لیے پیش پیش رہتی ہے۔ انہوں نے اس شعبے میں سعودی عرب کی عالمی سطح پر حاصل کردہ کامیابیوں اور قیادت کا بھی ذکر کیا۔

ڈاکٹر الربیعہ نے مزید کہا کہ سعودی کنجوائنڈ ٹوئنز پروگرام کی مسلسل کامیابیوں نے مملکت کو پیچیدہ طبی کیسز سے نمٹنے کے حوالے سے عالمی مرکز کی حیثیت دلائی ہے، جو اللہ کے فضل اور سعودی ماہرین کی اعلیٰ صلاحیتوں کا نتیجہ ہے۔

دوسری جانب، جڑواں بچیوں کے اہل خانہ نے سعودی حکومت اور عوام کا پرتپاک استقبال، بہترین دیکھ بھال اور فوری توجہ پر شکریہ ادا کیا۔