سعودی عرب کے مختلف علاقوں میں بارش اور تیز ہواؤں کی پیش گوئی

محکمہ موسمیات نے اپنی روزانہ کی موسمی رپورٹ میں بتایا ہے کہ آج ہفتہ کو نجران، جازان، عسیر، الباحہ اور مکہ مکرمہ کے بعض حصوں میں گرج چمک کے ساتھ بارش اور ژالہ باری متوقع ہے۔

رپورٹ میں مزید کہا گیا ہے کہ ان علاقوں کے علاوہ مدینہ منورہ کے کچھ حصوں اور جازان تک ساحلی شاہراہ پر بھی گرد آلود تیز ہواؤں کا سلسلہ جاری رہے گا۔

اسی طرح مشرقی ریجن اور ریاض کے بعض حصوں میں بھی گرج چمک کے ساتھ بارش کا امکان ہے، جبکہ ان علاقوں سمیت شمالی حدود اور قصیم کے کچھ حصوں میں درجہ حرارت میں اضافہ متوقع ہے۔

ہواؤں کی رفتار اور سمندر کی کیفیت

رپورٹ کے مطابق بحیرہ احمر میں سطحی ہوائیں شمال مغرب سے جنوب مغرب کی سمت میں 10 سے 30 کلومیٹر فی گھنٹہ کی رفتار سے چلیں گی، جبکہ درمیانی اور جنوبی حصے میں یہ رفتار 45 کلومیٹر فی گھنٹہ تک پہنچ سکتی ہے۔ جنوبی حصے میں گرج چمک کے ساتھ بارش کے دوران ہواؤں کی رفتار 50 کلومیٹر فی گھنٹہ تک جا سکتی ہے۔ شمالی حصے میں موجوں کی اونچائی آدھے میٹر سے ایک میٹر تک، جبکہ درمیانی اور جنوبی حصے میں آدھے میٹر سے دو میٹر تک ہوگی اور جنوبی حصے میں بارش کے دوران دو میٹر سے بھی تجاوز کر سکتی ہے۔

بحیرہ احمر کے شمالی حصے میں سمندر ہلکا متلاطم رہے گا، جبکہ درمیانی اور جنوبی حصے میں ہلکا سے درمیانہ اور جنوبی حصے میں بارش کے دوران شدید متلاطم ہو سکتا ہے۔

خلیج عرب میں ہوائیں جنوب مشرق سے جنوب مغرب کی سمت میں 10 سے 30 کلومیٹر فی گھنٹہ کی رفتار سے شمالی اور درمیانی حصے میں چلیں گی، جبکہ شمال مشرق سے جنوب مشرق کی سمت میں 10 سے 28 کلومیٹر فی گھنٹہ کی رفتار سے بھی چل سکتی ہیں۔ جنوبی حصے میں گرج چمک کے ساتھ بارش کے دوران ہواؤں کی رفتار 50 کلومیٹر فی گھنٹہ تک پہنچ سکتی ہے۔ موجوں کی اونچائی آدھے میٹر سے ایک میٹر تک رہے گی اور جنوبی حصے میں بارش کے دوران دو میٹر سے بھی زیادہ ہو سکتی ہے۔ سمندر کی کیفیت عمومی طور پر ہلکی متلاطم رہے گی، تاہم بارش کے دوران شدید متلاطم ہو سکتا ہے۔