ٹریفک پولیس کی جانب سے اشاروں پر قطار توڑنے سے خبردار

سعودی ٹریفک پولیس نے ڈرائیوروں کو متنبہ کیا ہے کہ اشاروں پر گاڑیوں کی قطار توڑنا ایک خطرناک عمل ہے جو سڑک استعمال کرنے والے سب افراد کی سلامتی کو خطرے میں ڈالتا ہے۔

اپنے سرکاری ایکس اکاؤنٹ پر جاری بیان میں ٹریفک پولیس نے واضح کیا کہ بعض ڈرائیوروں کا سڑک کے کنارے یا مخصوص یوٹرن لین کا استعمال کرتے ہوئے اشارے پر رکی گاڑیوں کو اوورٹیک کرنا انتہائی غیر ذمہ دارانہ حرکت ہے، جو نہ صرف خود ڈرائیور بلکہ اردگرد موجود دیگر گاڑیوں کے لیے بھی شدید خطرات کا باعث بنتی ہے۔

ٹریفک پولیس نے متعلقہ اداروں اور ڈرائیوروں پر زور دیا ہے کہ وہ متعین کردہ لینز اور ٹریفک قوانین کی مکمل پابندی کریں، کیونکہ یہی ٹریفک کی روانی اور غلط اوورٹیکنگ سے ہونے والے حادثات سے بچاؤ کی بنیادی ضمانت ہے۔