ابہا اور خمیس مشیط میں سول ڈیفنس کا ابتدائی انتباہ جاری

سعودی سول ڈیفنس نے ابہا اور خمیس مشیط میں قومی ابتدائی انتباہی پلیٹ فارم کے ذریعے ابتدائی انتباہ جاری کیا ہے، جس میں شہریوں کو ممکنہ خطرے سے خبردار کرتے ہوئے سرکاری ہدایات پر عمل کرنے کی ہدایت کی گئی ہے۔

متعلقہ اداروں نے شہریوں پر زور دیا ہے کہ وہ پرسکون رہیں اور دی گئی ہدایات پر عمل کریں، ساتھ ہی فوری طور پر قریبی محفوظ مقام یا عمارت کے اندرونی کمروں میں چلے جائیں اور کھڑکیوں سے دور رہیں۔ خطرہ ختم ہونے تک گھر یا عمارت نہ چھوڑیں۔

سول ڈیفنس نے خبردار کیا ہے کہ کھلی جگہوں، شیشے اور کھڑکیوں سے دور رہیں، بالکونی یا چھت پر ہرگز نہ جائیں۔ اگر گھر سے باہر ہوں تو قریبی عمارت میں پناہ لیں یا کسی مضبوط دیوار کے پیچھے چھپ جائیں۔

ہدایات میں واضح طور پر کہا گیا ہے کہ ہر قسم کے ہجوم اور ویڈیو یا تصاویر بنانے سے گریز کریں، خطرناک مقامات سے دور رہیں اور اگر گاڑی چلا رہے ہوں تو انتباہی پیغام ملتے ہی پلوں اور بلند عمارتوں سے دور سڑک کے کنارے رک جائیں۔

متعلقہ اداروں نے ہدایت کی ہے کہ کسی بھی خطرے کی صورت میں مکہ مکرمہ، مدینہ منورہ، ریاض اور مشرقی ریجن میں ہنگامی نمبر (911) اور مملکت کے دیگر علاقوں میں (998) پر رابطہ کریں، اور سرکاری ذرائع سے جاری ہدایات پر عمل کریں۔