وزارت حج و عمرہ نے بیرون ملک عازمین کے لیے جامع پیکیج متعارف کرا دیا

وزارت حج و عمرہ نے اعلان کیا ہے کہ بیرون ملک سے آنے والے عازمین حج کے لیے موسم حج 1448 ہجری میں 'جامع پیکیج' متعارف کرا دیا گیا ہے، جو حاجی کے مملکت میں داخلے سے لے کر روانگی تک فراہم کی جانے والی بنیادی خدمات کو یکجا کرتا ہے۔ اس پیکیج کی تیاری متعلقہ اداروں کے تعاون سے کی گئی ہے۔

وزارت نے وضاحت کی کہ اس پیکیج کا معاہدہ الیکٹرانک طور پر 'المسار الیکٹرانک پلیٹ فارم' کے ذریعے ایک ہی درخواست میں مکمل کیا جا سکتا ہے، جس سے طریقہ کار میں آسانی اور حاجیوں کے امور کے دفاتر، بیرونی حج ایجنسیوں اور خدمت فراہم کرنے والی کمپنیوں کے درمیان معاہداتی تعلقات کو منظم کرنے میں مدد ملے گی۔ اس کے علاوہ معاہدے کی کارکردگی اور شفافیت میں بھی بہتری آئے گی۔

اس پیکیج میں چار بنیادی خدمات شامل ہیں: مقدس مقامات پر خدمات، مکہ مکرمہ اور مدینہ منورہ میں قیام کی سہولیات، ٹرانسپورٹ اور کھانے پینے کا انتظام۔ اس کے ساتھ اضافی اختیاری خدمات بھی شامل کی جا سکتی ہیں، تاکہ حاجیوں کے امور کے دفاتر اور بیرونی ایجنسیاں مختلف گروپوں کی ضروریات اور ترجیحات کے مطابق پروگرام ترتیب دے سکیں، وہ بھی ایک واضح اور لچکدار معاہداتی نظام کے تحت۔

وزارت نے اس بات پر زور دیا کہ 'جامع پیکیج' کا اجرا موسم حج 1448 ہجری کی پیشگی تیاریوں کا حصہ ہے اور یہ سعودی قیادت کی ضیوف الرحمن کی خدمت کے عزم اور سعودی وژن 2030 و ضیوف الرحمن سروس پروگرام کے اہداف کے حصول کی سمت ایک اہم قدم ہے۔