سعودی عرب کے کئی علاقوں میں آج شدید بارش اور سیلاب کا خدشہ

محکمہ موسمیات نے اپنی روزانہ رپورٹ میں بتایا ہے کہ ہفتے کے روز جازان، عسیر، باحہ اور مکہ مکرمہ کے مختلف حصوں میں درمیانے سے شدید درجے کی گرج چمک کے ساتھ بارش متوقع ہے، جس کے باعث سیلابی ریلے بھی آ سکتے ہیں۔ ان بارشوں کے ساتھ ژالہ باری اور گرد و غبار اٹھانے والی تیز ہوائیں بھی چل سکتی ہیں۔

رپورٹ میں مزید کہا گیا ہے کہ مذکورہ علاقوں اور مدینہ منورہ و مشرقی ریجن کے ساحلی حصوں میں دھند چھائے رہنے کا امکان بھی برقرار ہے۔

بحر احمر کے حوالے سے محکمہ نے بتایا کہ شمالی حصے میں سطحی ہوائیں شمال مغرب سے شمال کی سمت 10 سے 36 کلومیٹر فی گھنٹہ کی رفتار سے چلیں گی، درمیانی حصے میں شمال مغرب سے شمال کی سمت 10 سے 35 کلومیٹر فی گھنٹہ جبکہ جنوبی حصے میں جنوب مشرق سے شمال مشرق کی سمت 10 سے 35 کلومیٹر فی گھنٹہ کی رفتار سے چلیں گی، جو گرج چمک کے ساتھ بارش کے دوران 50 کلومیٹر فی گھنٹہ سے بھی تجاوز کر سکتی ہیں۔

رپورٹ کے مطابق بحر احمر میں موجوں کی اونچائی آدھے میٹر سے ڈیڑھ میٹر تک رہے گی، جبکہ جنوبی حصے میں یہ دو میٹر تک پہنچ سکتی ہے۔ مجموعی طور پر سمندر کی کیفیت ہلکی سے درمیانی موجوں والی رہے گی۔

خلیج عرب کی موسمی صورتحال

خلیج عرب میں شمالی حصے پر سطحی ہوائیں جنوب مشرق سے جنوب مغرب کی سمت 10 سے 24 کلومیٹر فی گھنٹہ جبکہ جنوبی حصے میں شمال مغرب سے مغرب کی سمت 10 سے 28 کلومیٹر فی گھنٹہ کی رفتار سے چلیں گی۔ یہاں موجوں کی اونچائی آدھے میٹر سے ایک میٹر تک رہے گی اور سمندر کی کیفیت ہلکی موجوں والی ہوگی۔