سعودی عرب کے مختلف علاقوں میں آج گرج چمک کے ساتھ بارش اور سیلاب کا امکان

قومی مرکز برائے موسمیات نے اپنے یومیہ رپورٹ میں اتوار کے روز پیش گوئی کی ہے کہ جازان، عسیر، الباحہ اور مکہ مکرمہ کے بعض حصوں میں درمیانے سے شدید درجے کی گرج چمک کے ساتھ بارشیں متوقع ہیں، جو سیلاب کا باعث بن سکتی ہیں۔ ان بارشوں کے ساتھ ژالہ باری بھی ہو سکتی ہے۔

رپورٹ میں مزید کہا گیا ہے کہ نجران، ریاض، قصیم، حائل اور مدینہ منورہ کے بعض علاقوں میں بھی گرج چمک کے ساتھ بارش کے امکانات کو رد نہیں کیا جا سکتا، جبکہ ان علاقوں سمیت تبوک، الجوف اور شمالی سرحدی ریجن کے کچھ حصوں میں گرد آلود ہوائیں چلنے کا امکان ہے۔

اسی تناظر میں رپورٹ میں بتایا گیا ہے کہ مشرقی ریجن کے بعض حصوں میں موسم گرم سے شدید گرم رہے گا۔

ہوا اور سمندر کی صورتحال

رپورٹ کے مطابق بحیرہ احمر میں سطحی ہوائیں شمالی و شمال مغربی سمت سے 15 سے 40 کلومیٹر فی گھنٹہ کی رفتار سے شمالی اور وسطی حصے میں چلیں گی، جبکہ جنوبی حصے میں جنوب مغربی سے شمال مغربی سمت کی ہوائیں 10 سے 30 کلومیٹر فی گھنٹہ کی رفتار سے چلیں گی، جو گرج چمک کے ساتھ بارش کے دوران 50 کلومیٹر فی گھنٹہ سے تجاوز کر سکتی ہیں۔

موجوں کی بلندی آدھے میٹر سے ڈیڑھ میٹر تک رہے گی، جبکہ جنوبی حصے میں گرج چمک کے ساتھ بارش کے دوران دو میٹر سے بھی زیادہ ہو سکتی ہے۔ عام حالات میں سمندر ہلکا سے درمیانہ اور بارش کے دوران متلاطم رہے گا۔

خلیج عرب میں سطحی ہوائیں جنوب مغربی سے شمال مغربی سمت میں چلیں گی، جو رات کے وقت جنوبی مشرقی اور پھر جنوبی مغربی سمت اختیار کریں گی۔ جنوبی حصے میں دوپہر کے بعد ہوائیں شمال مغربی اور پھر جنوبی مغربی سمت میں 10 سے 28 کلومیٹر فی گھنٹہ کی رفتار سے چلیں گی۔ موجوں کی بلندی آدھے میٹر سے ایک میٹر تک رہے گی اور سمندر ہلکا متلاطم رہے گا۔