امام فیصل بن ترکی ریزرو میں مقامی لکڑی منتقل کرنے والا شخص گرفتار

خصوصی ماحولیاتی سکیورٹی فورس نے ایک شہری کو ماحولیاتی قوانین کی خلاف ورزی پر اس وقت گرفتار کیا جب وہ امام فیصل بن ترکی ریزرو میں ایک مکعب میٹر مقامی لکڑی منتقل کر رہا تھا۔ اس کے خلاف قانونی کارروائی کی جا رہی ہے اور ضبط شدہ لکڑی متعلقہ ادارے کے حوالے کر دی گئی ہے۔

فورس کے مطابق مقامی لکڑی اور کوئلہ منتقل کرنے پر فی مکعب میٹر 16 ہزار سعودی ریال تک جرمانہ عائد کیا جا سکتا ہے، جو ماحولیاتی قوانین کی خلاف ورزی پر نافذ ہوتا ہے۔

ماحولیاتی سکیورٹی فورس نے شہریوں سے اپیل کی ہے کہ وہ ماحول یا جنگلی حیات کو نقصان پہنچانے والے کسی بھی واقعے کی اطلاع مکہ مکرمہ، مدینہ منورہ، ریاض اور مشرقی ریجن میں 911 اور دیگر علاقوں میں 999 یا 996 پر دیں۔ فورس نے یقین دہانی کرائی ہے کہ تمام شکایات کو مکمل رازداری کے ساتھ نمٹایا جائے گا اور اطلاع دینے والے پر کوئی ذمہ داری عائد نہیں ہو گی۔