عدالتی فیصلوں میں اے آئی کا استعمال بڑھایا جائے گا: وزیر انصاف

وزیر انصاف ڈاکٹر ولید بن محمد الصمعانی نے اپیل عدالتوں کے کردار کو انتہائی اہم قرار دیتے ہوئے کہا ہے کہ یہ عدالتی نظام کی دوسری سطح ہیں اور انصاف کی ضمانت فراہم کرتی ہیں، جہاں فیصلوں کا جائزہ لیا جاتا ہے اور ان پر اعتراضات سنے جاتے ہیں، جس سے عدالتی عمل کی معیاریت میں اضافہ ہوتا ہے۔

یہ بات انہوں نے ریاض میں اپیل کورٹ کے شعبہ جات کے سربراہان سے ملاقات کے دوران کہی۔ انہوں نے کہا کہ عدالتی نظام میں جو ترقی ہوئی ہے وہ اللہ کے فضل اور خادم الحرمین الشریفین شاہ سلمان بن عبدالعزیز اور ولی عہد شہزادہ محمد بن سلمان کی غیر محدود حمایت اور مسلسل نگرانی کے باعث ممکن ہوئی ہے۔

ڈاکٹر الصمعانی نے اپیل عدالتوں کی کارکردگی میں ہونے والی بہتری کو سراہتے ہوئے کہا کہ شعبہ جات کے سربراہان کا کردار عدالتی معیار کی نگرانی، فیصلوں کی وجوہات پر توجہ، اعتراضات اور بنیادی دلائل پر بحث اور مقدمات کے فیصلے میں کلیدی ہے، جس سے عدالتی کارروائی کی کارکردگی اور سائلین کے تجربے میں بہتری آتی ہے۔

وزیر انصاف نے عدالتی نظام کی مستقبل کی ترجیحات پر بھی روشنی ڈالی، جن میں فنی دفاتر کے کردار کو مضبوط کرنا، عدالتی مطالعات اور فیصلوں کی تیاری میں مصنوعی ذہانت کی ایپلی کیشنز کا دائرہ بڑھانا اور سائلین کے سفر کو بہتر بنانا شامل ہے، تاکہ ادارہ جاتی پختگی اور عدالتی معیار کو مزید فروغ دیا جا سکے۔