شہباز شریف کا سعودی عرب سے مکمل یکجہتی کا اظہار

وزیراعظم پاکستان شہباز شریف نے سعودی عرب کے ساتھ اپنی مکمل یکجہتی کا اظہار کرتے ہوئے، مملکت کی شہری اور معاشی تنصیبات پر حالیہ حوثی حملوں کی شدید مذمت کی ہے۔

شہباز شریف نے ایکس پر جاری بیان میں بتایا کہ انہوں نے آج شام ولی عہد و وزیراعظم شہزادہ محمد بن سلمان بن عبدالعزیز آل سعود سے ٹیلیفونک رابطہ کیا، جس میں پاکستانی قیادت اور عوام کی جانب سے سعودی قیادت اور عوام کے ساتھ مکمل یکجہتی کا اظہار کیا۔

انہوں نے کہا کہ یہ غیر ذمہ دارانہ اقدامات علاقائی امن و استحکام کے لیے خطرہ ہیں اور خبردار کیا کہ ان کے عالمی معیشت اور توانائی کے تحفظ پر سنگین اثرات مرتب ہو سکتے ہیں۔

وزیراعظم پاکستان نے ولی عہد کی قیادت کو سراہتے ہوئے مشکل حالات میں ان کی حکمت اور بصیرت کی تعریف کی۔

شہباز شریف نے اس عزم کا اعادہ کیا کہ پاکستان، نائب وزیراعظم و وزیر خارجہ اسحاق ڈار اور آرمی چیف جنرل سید عاصم منیر کے ساتھ مل کر، خطے میں کشیدگی کم کرنے اور امن و استحکام کے فروغ کے لیے اپنی کوششیں جاری رکھے گا۔

اعرض التغريدة على منصة X