سعودی عرب میں آج گرج چمک کے ساتھ بارش اور تیز ہوائیں متوقع

محکمہ موسمیات نے آج کے موسم کی رپورٹ میں پیش گوئی کی ہے کہ جازان اور عسیر کے بعض علاقوں میں درمیانے سے شدید درجے کی گرج چمک کے ساتھ بارشیں ہوں گی، جو سیلابی ریلوں اور ژالہ باری کا سبب بن سکتی ہیں۔ نجران، الباحہ اور مکہ مکرمہ کے پہاڑی علاقوں میں ہلکی سے درمیانی بارش متوقع ہے، جبکہ ریاض اور مشرقی ریجن کے جنوبی حصوں میں بھی گرج چمک کے ساتھ بارش کا امکان ہے۔

ان علاقوں میں تیز ہوائیں بھی چلیں گی جو گرد و غبار کا باعث بن سکتی ہیں، جبکہ مدینہ منورہ اور مکہ مکرمہ کے ساحلی حصوں میں حد نگاہ تقریباً ختم ہو سکتی ہے۔ مشرقی ریجن، ریاض، مکہ اور مدینہ کے بعض حصوں میں درجہ حرارت زیادہ رہے گا۔

رپورٹ کے مطابق بحیرہ احمر کے شمالی اور وسطی حصوں میں سطحی ہوائیں شمال مغرب سے مغرب کی جانب 20 سے 45 کلومیٹر فی گھنٹہ کی رفتار سے چلیں گی، جبکہ جنوبی حصے میں 15 سے 35 کلومیٹر فی گھنٹہ کی رفتار ہوگی اور وسطی حصے میں 50 کلومیٹر فی گھنٹہ سے زیادہ بھی ہو سکتی ہے۔ جنوبی حصے میں گرج چمک کے ساتھ بارش کا امکان ہے۔ سمندر میں لہریں ایک سے دو میٹر بلند ہوں گی اور وسطی حصے میں ڈھائی میٹر تک جا سکتی ہیں۔ بحیرہ احمر میں موجیں درمیانی سے بلند رہیں گی، خاص طور پر وسطی حصے میں۔

خلیج عرب میں ہوائیں شمالی اور وسطی حصے میں جنوب مغرب سے جنوب مشرق کی سمت 10 سے 28 کلومیٹر فی گھنٹہ کی رفتار سے چلیں گی، جبکہ جنوبی حصے میں شمال مشرق سے شمال مغرب کی سمت ہوں گی۔ یہاں لہریں آدھے میٹر سے ایک میٹر تک بلند ہوں گی اور سمندر ہلکی موجوں والا رہے گا۔