جازان اور نجران میں ابتدائی انتباہ جاری، شہریوں کو احتیاط کی ہدایت

سعودی عرب میں محکمہ دفاعِ مدنی نے جازان اور نجران کے شہریوں سے اپیل کی ہے کہ وہ ہنگامی حالات کے لیے قومی ابتدائی انتباہی پلیٹ فارم سے جاری انتباہ کے بعد حفاظتی اقدامات پر عمل کریں۔

دفاعِ مدنی نے زور دیا ہے کہ شہری پرسکون رہیں اور سرکاری ہدایات پر عمل کریں، عمارتوں کے اندر رہیں اور کسی اندرونی کمرے یا محفوظ جگہ پر چلے جائیں جو کھڑکیوں سے دور ہو، اور خطرہ ختم ہونے تک گھر یا عمارت نہ چھوڑیں۔

ہدایت میں کہا گیا ہے کہ کھلی جگہوں اور شیشے سے دور رہیں، بالکونی یا چھت پر ہرگز نہ جائیں، جبکہ باہر موجود افراد کو قریبی عمارت میں داخل ہونے یا کسی مضبوط دیوار کے پیچھے پناہ لینے کا مشورہ دیا گیا ہے۔

محکمہ نے مزید تاکید کی ہے کہ لوگ ہرگز ہجوم نہ لگائیں اور نہ ہی کسی قسم کی ویڈیو یا تصاویر بنائیں، اور خطرناک مقامات سے دور رہیں۔ اگر انتباہی پیغام ڈرائیونگ کے دوران موصول ہو تو سڑک کے کنارے، پلوں اور بلند عمارتوں سے دور گاڑی روکنے کی ہدایت کی گئی ہے۔

محکمہ نے کہا ہے کہ کسی بھی خطرے کی صورت میں مکہ مکرمہ، مدینہ منورہ، ریاض اور مشرقی ریجن میں ہنگامی نمبر 911 اور باقی علاقوں میں 998 پر فوری رابطہ کریں۔

مزید کہا گیا ہے کہ شہری متعلقہ حکام کی جانب سے جاری کردہ ہدایات کو سرکاری ذرائع سے باقاعدگی سے دیکھیں اور ان پر عمل کریں۔