تبوک: ہلال احمر نے بارش کے پیش نظر ایمرجنسی تیاری بڑھا دی

سعودی ہلال احمر کے تبوک ریجنل دفتر نے اعلان کیا ہے کہ علاقے میں متوقع موسمی صورتحال کے پیش نظر اپنی ایمرجنسی تیاری بڑھا دی گئی ہے۔ یہ اقدام متعلقہ اداروں کی جانب سے جاری موسمی رپورٹ کے بعد کیا گیا ہے۔

تبوک میں ہلال احمر کے ڈائریکٹر جنرل نواف بن میاح العنزی نے بتایا کہ کمانڈ اینڈ کنٹرول سینٹر، تمام ایمبولینس ٹیمیں، فوری اور خصوصی رسپانس یونٹس، اضافی اور رضاکارانہ امدادی ٹیمیں منظور شدہ منصوبے کے مطابق چوبیس گھنٹے ہر قسم کی صورتحال سے نمٹنے کے لیے تیار ہیں۔

العنزی نے شہریوں اور مقیم غیرملکیوں سے اپیل کی کہ وہ متعلقہ اداروں کی ہدایات اور رہنما اصولوں پر عمل کریں، بارش کے دوران احتیاط برتیں، ٹریفک قوانین کی پابندی کریں اور سیلابی ریلوں یا پانی جمع ہونے والی جگہوں سے دور رہیں تاکہ اپنی حفاظت کو یقینی بنایا جا سکے اور بارش سے متعلق حادثات اور خطرات سے بچا جا سکے۔

انہوں نے مزید بتایا کہ ایمرجنسی سروسز کے لیے 997 پر کال، "اسعفنی" ایپ کے ذریعے یا "توکلنا" ایپ پر ایمرجنسی کال کے ذریعے چوبیس گھنٹے رابطہ کیا جا سکتا ہے۔