کابینہ کی پبلک مقامات پر ایمرجنسی سیفٹی پالیسی کی منظوری

خادم الحرمین الشریفین شاہ سلمان بن عبدالعزیز کی زیر صدارت آج جدہ میں ہونے والے اجلاس میں کابینہ نے عوامی مقامات اور کام کی جگہوں پر ایمرجنسی سیفٹی کو فروغ دینے کی قومی پالیسی کی منظوری دے دی۔

بین الاقوامی تعاون کے تحت، کابینہ نے سعودی عرب کے دیوان عام محاسبہ اور جمہوریہ قبرص و گامبیا کے آڈٹ دفاتر کے درمیان دو مفاہمتی یادداشتوں کی منظوری دی، جن کا مقصد حسابات، نگرانی اور پیشہ ورانہ شعبوں میں تعاون کو فروغ دینا ہے۔

کابینہ نے وزیر افرادی قوت و سماجی ترقی اور بینک برائے سماجی ترقی کے چیئرمین یا ان کے نمائندے کو اقوام متحدہ کے ادارہ برائے تجارت و ترقی کے ساتھ چھوٹے اور درمیانے درجے کی کمپنیوں کی فنی معاونت اور صلاحیت سازی کے لیے معاہدے پر بات چیت کا اختیار دیا۔

اسی طرح وزیر تعلیم اور نیشنل ای لرننگ سینٹر کے چیئرمین یا ان کے نمائندے کو تعلیم کے شعبے میں علاقائی مرکز برائے معیار و امتیاز کے ساتھ ای لرننگ تعاون کی مفاہمتی یادداشت پر بات چیت کا اختیار دیا گیا۔

کابینہ نے وزیر صحت یا ان کے نمائندے کو سعودی عرب اور پرتگال کی وزارت صحت کے درمیان صحت کے شعبے میں تعاون سے متعلق مفاہمتی یادداشت پر بات چیت اور دستخط کا اختیار بھی دیا۔

ٹرانسپورٹ کے شعبے میں، کابینہ نے وزیر ٹرانسپورٹ و لاجسٹکس یا ان کے نمائندے کو اقوام متحدہ کی جنرل اسمبلی کی منظور شدہ قابل منتقلی شپنگ دستاویزات سے متعلق معاہدے پر دستخط کا اختیار دیا۔