سعودی عرب میں ٹیلی کمیونیکیشن اور خلائی ٹیکنالوجی میں پائیداری رپورٹ جاری

سعودی اتصالات و خلائی و ٹیکنالوجی اتھارٹی نے عالمی ادارہ برائے ٹیلی کمیونیکیشن (ITU) اور وزارت مواصلات و انفارمیشن ٹیکنالوجی کے اشتراک سے "ٹیلی کمیونیکیشن، خلائی اور ٹیکنالوجی کے شعبے میں پائیداری" پر پانچویں رپورٹ جاری کر دی ہے۔ اس کا مقصد پائیداری کے شعبے میں شفافیت کو فروغ دینا، اس بارے میں آگاہی بڑھانا، فیصلہ سازی میں معاونت اور سرمایہ کاری کو راغب کرنا ہے۔ رپورٹ میں سعودی عرب کی جانب سے ڈیجیٹل اور خلائی ٹیکنالوجیز کو پائیدار ترقی کے لیے بروئے کار لانے اور عالمی سطح پر ڈیجیٹل ریگولیشن و پائیداری میں اپنی پوزیشن مضبوط بنانے کی کوششوں کو اجاگر کیا گیا ہے۔

اتھارٹی کے ایک بیان کے مطابق، رپورٹ میں سال 2025 کے دوران ڈیجیٹل پائیداری کے شعبے میں سعودی عرب کی نمایاں قومی کامیابیوں کو اجاگر کیا گیا ہے۔ ان میں عالمی ادارہ برائے ٹیلی کمیونیکیشن کے ترقیاتی انڈیکس (IDI) میں سعودی عرب کا دنیا بھر میں پہلی پوزیشن حاصل کرنا شامل ہے، جو ملک کے مضبوط ڈیجیٹل انفراسٹرکچر کا عکاس ہے اور پائیدار ترقی کے اہداف کے حصول میں معاون ہے۔ اس کے علاوہ، ریاض میں عالمی ریگولیٹرز سیمینار (GSR-25) کی میزبانی، "ریاض کی اختراعی ریگولیشن کی سفارشات" کا اجرا، ای ویسٹ مینجمنٹ اور سرکلر اکانومی کے فروغ کے لیے عالمی رہنما اصولوں کی تیاری، ڈیجیٹل ریگولیشن نیٹ ورک کی گورننگ باڈی میں سعودی عرب کی شمولیت، زمینی نگرانی کے لیے خلائی پلیٹ فارم اور خلائی موسم کی نگرانی کے لیے "شمس" سیٹلائٹ کی لانچنگ بھی شامل ہے۔

رپورٹ میں اتھارٹی اور اس کے شراکت داروں کی سرکلر ڈیجیٹل اکانومی، خلائی پائیداری، ریگولیٹری صلاحیت سازی اور بین الاقوامی تعاون کے میدان میں نمایاں اقدامات کو بھی اجاگر کیا گیا ہے۔ اس کے ساتھ ساتھ مستقبل کے ان اہداف کا بھی ذکر کیا گیا ہے جو سعودی وژن 2030 اور پائیدار ترقی کے مقاصد کے حصول کے لیے زیادہ پائیدار ڈیجیٹل اور خلائی مستقبل کی تعمیر پر مرکوز ہیں۔

رپورٹ میں ماحولیاتی، اقتصادی اور سماجی پائیداری کے شعبوں میں 14 قومی کامیابیوں کی کہانیاں بھی پیش کی گئی ہیں، جو 25 سے زائد سرکاری و نجی اداروں کی شراکت سے جدید ٹیکنالوجیز جیسے مصنوعی ذہانت، خلائی ٹیکنالوجی اور سیٹلائٹ کے ذریعے زمینی نگرانی کے استعمال پر مبنی ہیں۔ اس سے ظاہر ہوتا ہے کہ ٹیکنالوجی کس طرح ماحولیاتی اور ترقیاتی چیلنجز سے نمٹنے اور معاشرے و معیشت پر دیرپا اثرات مرتب کرنے میں کردار ادا کر رہی ہے۔

اعرض التغريدة على منصة X