سعودی و شامی نشریاتی اداروں میں تعاون کے فروغ کیلئے معاہدہ

سعودی عرب کی نشریاتی اتھارٹی اور شام کی جنرل اتھارٹی برائے نشریات و ٹیلی ویژن نے آج اتوار کو ریاض میں ایک مفاہمتی یادداشت پر دستخط کیے ہیں جس کا مقصد دونوں ممالک کے درمیان نشریاتی اور ٹیلی ویژن شعبوں میں تعلقات مضبوط اور تعاون کو فروغ دینا ہے۔

دستخط کی تقریب میں سعودی وزیر اطلاعات سلمان بن یوسف الدوسری اور شامی وزیر اطلاعات ڈاکٹر خالد فواز زعرور موجود تھے۔ سعودی جانب سے مفاہمتی یادداشت پر نشریاتی اتھارٹی کے چیف ایگزیکٹو علی بن عبداللہ الزید اور شامی جانب سے جنرل اتھارٹی کے ڈائریکٹر جنرل علاء مصطفی برسيلو نے دستخط کیے۔

دونوں فریقین نے واضح کیا کہ اس یادداشت کے تحت ثقافت، تعلیم، سائنس، تفریح، کھیل اور خبروں کے شعبوں میں سمعی و بصری پروگراموں کا تبادلہ کیا جائے گا، جس سے دونوں ممالک کے عوام کے لیے میڈیا مواد کو تقویت ملے گی۔

تجربات کا تبادلہ اور مشترکہ تقریبات کا انعقاد

یادداشت میں یہ بھی شامل ہے کہ متعلقہ شعبوں میں معلومات اور تجربات کا تبادلہ، ماہرین اور متعلقہ افراد کے دوروں کا فروغ، کانفرنسوں، سیمینارز اور ورکشاپس کا انعقاد اور باہمی دلچسپی کے مواقع سے فائدہ اٹھانے پر اتفاق کیا گیا ہے۔