جازان میں ایمرجنسی وارننگ جاری، شہریوں کو احتیاط کی ہدایت

سعودی عرب میں محکمہ شہری دفاع نے جازان کے رہائشیوں سے اپیل کی ہے کہ وہ ایمرجنسی کی صورت میں قومی وارننگ پلیٹ فارم سے جاری انتباہ کے بعد حفاظتی اقدامات پر عمل کریں۔

شہری دفاع نے زور دیا ہے کہ لوگ پرسکون رہیں، سرکاری ہدایات پر عمل کریں، عمارتوں کے اندر رہیں اور کسی اندرونی کمرے یا محفوظ جگہ پر چلے جائیں جو کھڑکیوں سے دور ہو، اور خطرہ ختم ہونے تک گھر یا عمارت سے باہر نہ نکلیں۔

ہدایت میں یہ بھی کہا گیا ہے کہ کھلی جگہوں اور شیشے سے دور رہیں، بالکونی یا چھت پر کھڑے نہ ہوں، جبکہ باہر موجود افراد کو قریب ترین عمارت میں داخل ہونے یا کسی مضبوط دیوار کے پیچھے پناہ لینے کا مشورہ دیا گیا ہے۔

اعرض التغريدة على منصة X

محکمہ نے مزید تاکید کی ہے کہ لوگ ہجوم سے گریز کریں، ہرگز ویڈیو یا تصاویر نہ بنائیں اور خطرناک مقامات سے دور رہیں۔ اگر وارننگ پیغام ڈرائیونگ کے دوران ملے تو فوراً سڑک کے کنارے رک جائیں اور پلوں یا بلند عمارتوں سے دور رہیں۔

محکمہ نے ہدایت کی ہے کہ مکہ مکرمہ، مدینہ منورہ، ریاض اور مشرقی ریجن میں کسی بھی خطرے کی صورت میں ایمرجنسی نمبر 911 اور باقی علاقوں میں 998 پر رابطہ کریں۔

انہوں نے یہ بھی کہا کہ متعلقہ اداروں کی جانب سے جاری کردہ ہدایات کو سرکاری ذرائع سے باقاعدگی سے فالو کریں اور ان پر عمل کریں۔