ماحولیاتی قوانین کی خلاف ورزی: پانچ افراد گرفتار

خصوصی فورس برائے ماحولیاتی تحفظ نے ماحولیاتی قوانین کی خلاف ورزی پر تین مختلف واقعات میں پانچ افراد کو گرفتار کیا ہے۔ ان میں بغیر اجازت کیمپنگ، ریت اور بجری کا غیرقانونی استعمال اور ممنوعہ علاقوں میں چرائی شامل ہیں۔ تمام ملزمان کے خلاف قانونی کارروائی کی گئی ہے۔

پہلے واقعے میں فورس نے ایک یمنی باشندے کو امام فیصل بن ترکی رائل ریزرو میں بغیر اجازت کیمپنگ کرنے پر گرفتار کیا۔ فورس کے مطابق جنگلات یا قومی پارکوں میں بغیر اجازت کیمپنگ پر تین ہزار سعودی ریال تک جرمانہ عائد کیا جا سکتا ہے۔

اعرض التغريدة على منصة X

اسی طرح مشرقی ریجن میں تین پاکستانی باشندوں کو ریت اور بجری کے غیرقانونی استعمال پر گرفتار کیا گیا، جن کے قبضے سے چار مشینیں برآمد ہوئیں جو زمین کی کھدائی اور نقل و حمل میں استعمال ہو رہی تھیں۔ ان کے خلاف بھی قانونی کارروائی عمل میں لائی گئی۔

اعرض التغريدة على منصة X

تیسرے واقعے میں فورس نے ایک سعودی شہری کو شاہ عبدالعزیز رائل ریزرو میں ممنوعہ علاقے میں چالیس بھیڑیں چراتے ہوئے گرفتار کیا اور اس کے خلاف بھی قانونی کارروائی کی گئی۔

اعرض التغريدة على منصة X

فورس نے واضح کیا کہ ممنوعہ علاقوں میں بھیڑیں چرانے پر فی جانور دو سو ریال جرمانہ عائد کیا جاتا ہے۔ ساتھ ہی شہریوں سے اپیل کی گئی ہے کہ وہ ماحول یا جنگلی حیات پر کسی بھی قسم کے حملے کی اطلاع دیں۔

فورس کے مطابق مکہ مکرمہ، مدینہ منورہ، ریاض اور مشرقی ریجن میں شکایات کے لیے 911 جبکہ دیگر علاقوں میں 999 اور 996 پر رابطہ کیا جا سکتا ہے۔ فورس نے یقین دہانی کرائی کہ تمام شکایات کو مکمل رازداری کے ساتھ نمٹایا جائے گا اور اطلاع دینے والے پر کوئی ذمہ داری عائد نہیں ہوگی۔