جنوبی کوریا کی حوثی حملوں کی مذمت، فوری بندش کا مطالبہ

جنوبی کوریا نے حوثی ملیشیا کی جانب سے سعودی عرب میں شہری اور اقتصادی تنصیبات پر حالیہ حملوں کی شدید مذمت کی ہے اور ان حملوں کو فوری طور پر بند کرنے کا مطالبہ کیا ہے۔

کورین وزارت خارجہ نے اپنے بیان میں کہا: "ہم حوثیوں کے ان حملوں کی مذمت کرتے ہیں جن میں سعودی عرب کے جنوبی علاقے میں شہریوں اور اقتصادی تنصیبات کو نشانہ بنایا گیا اور متعدد شہری زخمی ہوئے۔" وزارت نے اس موقع پر سعودی عرب سے مکمل یکجہتی کا اظہار بھی کیا۔

کورین خبررساں ایجنسی یونہاپ کے مطابق، وزارت نے کہا کہ شہریوں اور شہری تنصیبات کو نشانہ بنانے والے حملے، نیز وہ اقدامات جو بحری جہاز رانی کی آزادی اور سلامتی کو متاثر کرتے ہیں، کسی بھی صورت میں قابل قبول یا قابل جواز نہیں۔ وزارت نے حوثیوں سے مطالبہ کیا کہ وہ اس قسم کے حملے فوراً بند کریں۔

وزارت نے مزید کہا کہ مشرق وسطیٰ میں امن و استحکام، بالخصوص بحیرہ احمر میں جہاز رانی کی آزادی اور سلامتی کی ضمانت، عالمی برادری کے لیے انتہائی اہمیت رکھتی ہے، کیونکہ یہ عالمی سپلائی چین اور توانائی کے تحفظ سے جڑی ہوئی ہے۔