خادم الحرمین کی زیر سرپرستی ریاض انٹرنیشنل ہیومینیٹرین فورم 2027 کا اعلان

خادم الحرمین الشریفین شاہ سلمان بن عبدالعزیز آل سعود کی زیر سرپرستی، مرکز سلمان برائے امداد و انسانی خدمات 11 اور 12 اپریل 2027 کو ریاض انٹرنیشنل ہیومینیٹرین فورم کا پانچواں ایڈیشن ریاض میں منعقد کرے گا۔ اس فورم میں دنیا بھر سے انسانی خدمت کے شعبے سے وابستہ تنظیموں کے سربراہان، عطیہ دہندگان، کارکنان اور ماہرین شرکت کریں گے، جبکہ اقوام متحدہ اور اس کی انسانی تنظیمیں بھی اس میں شراکت دار ہوں گی۔

اس موقع پر مرکز سلمان برائے امداد و انسانی خدمات کے نگرانِ اعلیٰ ڈاکٹر عبداللہ بن عبدالعزیز الربیعہ نے خادم الحرمین الشریفین کا شکریہ ادا کرتے ہوئے کہا کہ اس فورم کی سرپرستی شاہ سلمان اور ولی عہد و وزیراعظم کی انسانی و امدادی سرگرمیوں کے فروغ اور عالمی سطح پر ان کے دائرہ کار کو وسعت دینے کے عزم کی عکاس ہے۔

انہوں نے کہا کہ مرکز سلمان کو بین الاقوامی اور علاقائی تنظیموں کے نمائندوں کی فورم میں شرکت پر خوشی ہے اور امید ظاہر کی کہ اس فورم کی سرگرمیاں انسانی خدمت کے سفر کو مزید آگے بڑھانے، پائیدار اسٹریٹجک شراکتیں قائم کرنے اور دنیا بھر کے متاثرہ و ضرورت مند افراد تک رسائی میں معاون ثابت ہوں گی۔