سعودی عرب میں نیا تعلیمی سال کل سے شروع ہوگا

وزارت تعلیم نے اعلان کیا ہے کہ نئے تعلیمی سال کا آغاز کل اتوار سے ہو رہا ہے، جس کے لیے اسکولوں اور تعلیمی نظام کی مکمل تیاری کر لی گئی ہے تاکہ طلبہ کو گرمیوں کی تعطیلات کے بعد خوش آمدید کہا جا سکے۔

وزارت کے مطابق، اسکولوں میں 3 کروڑ 60 لاکھ سے زائد نصابی کتابیں تعطیلات سے قبل ہی پہنچا دی گئی تھیں، جو اپنی نوعیت کی تیز ترین فراہمی ہے۔

نصاب میں نمایاں بہتری کی گئی ہے، وزارت نے 22 تعلیمی مضامین کو اپ ڈیٹ کیا اور مصنوعی ذہانت کے 50 یونٹس شامل کیے ہیں، اس کے علاوہ باصلاحیت طلبہ کے لیے خصوصی اسکول بھی متعارف کرائے گئے ہیں۔

تعلیمی مواقع کو وسعت دینے کے لیے وزارت نے نجی تعلیمی شعبے میں 200 نئی عمارتیں فراہم کی ہیں، جس سے 1 لاکھ 60 ہزار اضافی نشستیں دستیاب ہو گئی ہیں، یہ اقدام تعلیمی شعبے کی گنجائش بڑھانے کی کوششوں کا حصہ ہے۔

وزارت تعلیم جدید ڈیجیٹل خدمات کی فراہمی بھی جاری رکھے ہوئے ہے، جن میں تعلیمی پورٹل نمایاں ہے جو طلبہ، والدین اور اساتذہ کے لیے تمام تعلیمی خدمات کا مرکزی ذریعہ ہے۔

مملکت میں تعلیمی نظام نئے تعلیمی سال کو نصاب اور تدریسی طریقوں کی ترقی اور تعلیمی عمل کی قیادت کے سفر میں اہم سنگ میل قرار دے رہا ہے، تاکہ بدلتی ضروریات کے مطابق معیاری اور مؤثر تعلیم فراہم کی جا سکے۔