سعودی قیادت کی یمنی شہریوں کے لیے ہدایت، تعلقات کی گہرائی کا عکاس

سعودی عرب میں یمن کے سفیر سالم صالح بن بریک نے خادم الحرمین الشریفین شاہ سلمان بن عبدالعزیز اور ولی عہد و وزیراعظم شہزادہ محمد بن سلمان کا یمنی عوام کے لیے خصوصی توجہ اور سرپرستی پر شکریہ ادا کیا ہے۔

سفیر بن بریک نے واضح کیا کہ خادم الحرمین الشریفین کی جانب سے یمنی صدارتی قیادت کونسل کے سربراہ ڈاکٹر رشاد محمد العلیمی کی درخواست پر سعودی عرب میں غیر قانونی طور پر مقیم یمنی شہریوں کے حالات درست کرنے کی ہدایت، مملکت کے یمن اور اس کے عوام کے ساتھ دیرینہ برادرانہ اور انسانی موقف کا تسلسل ہے۔

انہوں نے کہا کہ یہ ہدایت دونوں ملکوں اور عوام کے درمیان تاریخی اور برادرانہ تعلقات کی گہرائی کو ظاہر کرتی ہے اور اس سے یمن کو سعودی قیادت کی مسلسل حمایت اور توجہ کا اظہار ہوتا ہے، خاص طور پر ان غیر معمولی حالات میں جن سے یمنی عوام گزر رہے ہیں۔

سفیر نے اس بات کی نشاندہی کی کہ سعودی عرب ہر دور میں یمن کا سب سے قریبی سہارا رہا ہے اور سعودی حمایت صرف سرکاری سطح تک محدود نہیں بلکہ دونوں ممالک کے درمیان گہرے برادرانہ اور انسانی رشتوں پر بھی مبنی ہے۔

فائدہ اٹھانے اور ہدایات پر عمل کی اپیل

اس موقع پر سفیر بن بریک نے متعلقہ یمنی کمیونٹی کے افراد پر زور دیا کہ وہ اس شاہی رعایت سے بھرپور فائدہ اٹھائیں اور آئندہ جاری ہونے والی سرکاری ہدایات و ضوابط کی مکمل پابندی کریں۔

انہوں نے یقین دہانی کرائی کہ ریاض میں یمنی سفارت خانہ متعلقہ اداروں سے رابطے جاری رکھے گا اور جیسے ہی اس فیصلے سے متعلق قونصلر خدمات اور دیگر اقدامات سامنے آئیں گے، شہریوں کو آگاہ کر دیا جائے گا۔