سعودی عرب میں آج گرج چمک کے ساتھ بارش اور تیز ہوائیں متوقع

محکمہ موسمیات نے آج منگل کے روز اپنی رپورٹ میں پیش گوئی کی ہے کہ جازان، عسیر اور باحہ کے مختلف حصوں میں گرج چمک کے ساتھ بارش، ژالہ باری اور تیز ہوائیں چلنے کا امکان ہے۔ اسی طرح مشرقی اور ریاض کے کچھ حصوں میں درجہ حرارت زیادہ رہنے کی توقع ہے۔

محکمہ موسمیات نے مزید بتایا کہ تیز ہوائیں، گرد و غبار اور مٹی کے طوفان جازان، عسیر، باحہ کے علاوہ نجران، مدینہ منورہ اور مکہ مکرمہ کے کچھ علاقوں کو متاثر کر سکتے ہیں، جبکہ مکہ مکرمہ کے جنوبی ساحلی حصوں میں حد نگاہ تقریباً ختم ہو سکتی ہے۔

محکمہ موسمیات کے مطابق بحیرہ احمر میں سطحی ہوائیں شمال مغرب سے مغرب کی سمت 15 تا 35 کلومیٹر فی گھنٹہ کی رفتار سے چلیں گی، جبکہ درمیانی حصے میں یہ رفتار 45 کلومیٹر فی گھنٹہ تک پہنچ سکتی ہے اور جنوبی حصے میں گرج چمک کے ساتھ بارش کے دوران 50 کلومیٹر فی گھنٹہ سے بھی تجاوز کر سکتی ہے۔ موجوں کی اونچائی آدھے میٹر سے ڈیڑھ میٹر تک اور درمیانی حصے میں دو میٹر سے بھی زیادہ ہو سکتی ہے۔ مجموعی طور پر سمندر کی کیفیت ہلکی سے درمیانی اور درمیانی حصے میں گرج چمک کے ساتھ بارش کے دوران شدید ہو سکتی ہے۔

خلیج عرب میں شمال مغرب سے مغرب کی سمت ہوائیں 15 تا 35 کلومیٹر فی گھنٹہ کی رفتار سے شمالی حصے میں جبکہ درمیانی اور جنوبی حصے میں جنوب مشرق سے شمال مشرق کی سمت 10 تا 28 کلومیٹر فی گھنٹہ کی رفتار سے چلیں گی۔ موجوں کی اونچائی آدھے میٹر سے ایک میٹر تک اور سمندر کی کیفیت ہلکی رہے گی۔