سعودی عرب میں آج بارش اور تیز ہواؤں کی پیش گوئی

محکمہ موسمیات نے اپنی آج کی رپورٹ میں پیش گوئی کی ہے کہ جازان اور عسیر کے بعض حصوں میں درمیانے سے شدید درجے کی گرج چمک کے ساتھ بارشیں ہوں گی، جن سے سیلابی صورتحال پیدا ہو سکتی ہے اور ژالہ باری بھی متوقع ہے۔ مکہ مکرمہ، الباحہ اور نجران کے کچھ علاقوں میں ہلکی سے درمیانی بارش کا امکان ہے۔ اس کے علاوہ ان علاقوں اور مدینہ منورہ، ریاض، مشرقی ریجن، شمالی سرحدی علاقہ اور الجوف کے کچھ حصوں میں گرد آلود تیز ہوائیں چلنے کا سلسلہ بھی جاری رہے گا۔ مشرقی اور وسطی علاقوں میں درجہ حرارت میں اضافہ متوقع ہے۔

رپورٹ کے مطابق بحیرہ احمر کے شمالی حصے میں سطحی ہوائیں شمال مغرب سے مغرب کی سمت 10 تا 32 کلومیٹر فی گھنٹہ کی رفتار سے چلیں گی، جبکہ درمیانی اور جنوبی حصے میں جنوب مغرب سے مغرب کی سمت 10 تا 25 کلومیٹر فی گھنٹہ کی رفتار رہے گی، جو گرج چمک کے ساتھ بارش کے دوران 50 کلومیٹر فی گھنٹہ تک پہنچ سکتی ہے۔ شمالی حصے میں موجوں کی اونچائی نصف میٹر سے ڈیڑھ میٹر تک، جبکہ درمیانی اور جنوبی حصے میں نصف میٹر سے ایک میٹر تک رہے گی، جو جنوبی حصے میں گرج چمک کے ساتھ بارش کے دوران ڈھائی میٹر سے بھی زیادہ ہو سکتی ہے۔ شمالی حصے میں سمندر کی کیفیت ہلکی سے درمیانی موج، جبکہ درمیانی اور جنوبی حصے میں ہلکی موج رہے گی، جو بارش کے دوران جنوبی حصے میں تیز موج میں بدل سکتی ہے۔

خلیج عرب میں سطحی ہوائیں شمال مغرب سے شمال مشرق کی سمت 15 تا 30 کلومیٹر فی گھنٹہ کی رفتار سے چلیں گی اور موجوں کی اونچائی نصف میٹر سے ڈیڑھ میٹر تک رہے گی۔ سمندر کی کیفیت ہلکی سے درمیانی موج ہوگی۔