دمام ایئرپورٹ پر 40 ہزار ممنوعہ گولیاں اسمگل کرنے کی کوشش ناکام

دمام کے کنگ فہد انٹرنیشنل ایئرپورٹ کے کسٹمز نے 40 ہزار ایمفیٹامین نشہ آور گولیاں اسمگل کرنے کی کوشش ناکام بنا دی۔ یہ گولیاں ایک پارسل میں چھپائی گئی تھیں جو مملکت میں ایئرپورٹ کے ذریعے بھیجا گیا تھا۔

ہیئة زکوة و ٹیکس و کسٹمز کے ترجمان حمود الحربی نے بتایا کہ ایئرپورٹ پر موصول ہونے والے ایک ڈاک پارسل کو جب کسٹمز کارروائی اور سکیورٹی ٹیکنالوجی کے ذریعے چیک کیا گیا تو اس میں شیشے کے کپوں کے اندر یہ نشہ آور گولیاں چھپائی ہوئی پائی گئیں۔

حمود الحربی نے مزید بتایا کہ ضبطی کے بعد انسداد منشیات کی جنرل ڈائریکٹوریٹ سے رابطہ کیا گیا، جس کے نتیجے میں مملکت کے اندر ممنوعہ اشیا وصول کرنے والے دو افراد کو گرفتار کر لیا گیا۔

ترجمان نے اس بات پر زور دیا کہ ادارہ اپنے تمام کسٹمز پوائنٹس پر مملکت کی درآمدات و برآمدات پر سخت نگرانی جاری رکھے ہوئے ہے اور اسمگلنگ کی کوششوں کو روکنے کے لیے پرعزم ہے۔ اس کا مقصد معاشرے کے تحفظ اور سکیورٹی کو مضبوط بنانا ہے، جس کے لیے وزارت داخلہ اور انسداد منشیات کی جنرل ڈائریکٹوریٹ سمیت دیگر شراکت دار اداروں کے ساتھ تعاون کیا جا رہا ہے۔

حمود الحربی نے عوام سے اپیل کی کہ وہ اسمگلنگ کی روک تھام اور قومی معیشت و معاشرے کے تحفظ کے لیے تعاون کریں۔ اس مقصد کے لیے کسٹمز نے سکیورٹی شکایات کے لیے نمبر (1910)، ای میل ([email protected]) اور بین الاقوامی نمبر (009661910) جاری کیا ہے۔ ان ذرائع سے موصول ہونے والی معلومات کو مکمل رازداری کے ساتھ نمٹایا جاتا ہے اور درست اطلاع دینے والے کو مالی انعام بھی دیا جاتا ہے۔