رابطہ عالم اسلامی کی سعودی شہروں پر حوثی حملوں کی مذمت

رابطہ عالم اسلامی نے سعودی عرب پر حوثی ملیشیا کے حملوں کی شدید مذمت کی ہے۔ خمیس مشیط، ابہا اور طائف شہروں کو متعدد بیلسٹک میزائلوں اور ڈرونز سے نشانہ بنایا گیا، جس کے نتیجے میں شہری زخمی ہوئے اور کئی گھروں و گاڑیوں کو نقصان پہنچا۔

رابطہ کے سیکریٹری جنرل اور مجلس علماء مسلمین کے سربراہ، شیخ ڈاکٹر محمد بن عبد الکریم العیسیٰ نے تنظیم کے جنرل سیکریٹریٹ کی جانب سے جاری بیان میں ان حملوں کو مجرمانہ اور بزدلانہ قرار دیتے ہوئے کہا کہ یہ حملے مذہبی اقدار، بین الاقوامی قوانین اور انسانی اصولوں کی کھلی خلاف ورزی ہیں۔

انہوں نے مزید کہا کہ یہ حملے حوثی ملیشیا کے مجرمانہ طرزعمل کی عکاسی کرتے ہیں، جو دانستہ طور پر شہریوں اور شہری تنصیبات کو نشانہ بنا رہی ہے۔

شیخ العیسیٰ نے رابطہ کی عالمی مجالس، اداروں اور اس کے تحت آنے والی اسلامی اقوام کی جانب سے مملکت کے ساتھ مکمل یکجہتی کا اظہار کیا اور کہا کہ سعودی عرب اپنے شہریوں اور مقیم افراد کے تحفظ کے لیے جو بھی اقدامات کرے گا، رابطہ اس کی بھرپور حمایت کرے گی۔

انہوں نے دعا کی کہ اللہ تعالیٰ مملکت سعودی عرب، اس کی قیادت اور عوام کو ہر آفت اور برائی سے محفوظ رکھے۔