سعودی عرب کے مختلف علاقوں میں گرج چمک کے ساتھ بارش کا امکان

محکمہ موسمیات نے بدھ کے روز اپنی رپورٹ میں بتایا ہے کہ جازان، عسیر، الباحہ، مکہ مکرمہ، مدینہ منورہ، حائل، تبوک، الجوف اور شمالی حدود کے بعض حصوں میں درمیانے سے تیز بارش اور ژالہ باری کا امکان ہے، جس سے سیلابی صورتحال بھی پیدا ہو سکتی ہے۔ اسی طرح قصیم اور مشرقی ریجن کے کچھ حصوں میں ہلکی سے درمیانے درجے کی بارش متوقع ہے۔ ان علاقوں میں بعض مقامات پر دھند چھانے کا بھی امکان ہے۔

رپورٹ کے مطابق بحیرہ احمر میں سطحی ہوائیں جنوب مشرقی سے شمال مغربی سمت میں 10 تا 30 کلومیٹر فی گھنٹہ کی رفتار سے چلیں گی، جبکہ شمالی حصے میں ان کی رفتار 60 کلومیٹر فی گھنٹہ سے بھی زیادہ ہو سکتی ہے۔ درمیانی حصے میں ہوائیں جنوبی مغربی سے شمال مغربی سمت میں 10 تا 33 کلومیٹر فی گھنٹہ اور جنوبی حصے میں جنوب مشرقی سے جنوبی مغربی سمت میں 15 تا 35 کلومیٹر فی گھنٹہ کی رفتار سے چلیں گی، جو بعض اوقات 60 کلومیٹر فی گھنٹہ سے تجاوز کر سکتی ہیں۔ سمندر میں لہریں آدھے میٹر سے ڈیڑھ میٹر تک بلند ہوں گی اور بعض مقامات پر دو میٹر سے بھی زیادہ ہو سکتی ہیں۔ مجموعی طور پر سمندر کی حالت ہلکی سے درمیانی رہے گی، جبکہ بعض حصوں میں تیز لہریں اور گرج چمک کے ساتھ بارش متوقع ہے۔

خلیج عرب میں ہوائیں شمال مغربی سے جنوب مغربی سمت میں 10 تا 25 کلومیٹر فی گھنٹہ کی رفتار سے چلیں گی، جبکہ شمالی حصے میں ان کی رفتار 60 کلومیٹر فی گھنٹہ سے زیادہ ہو سکتی ہے۔ جنوبی حصے میں ہوائیں شمال مغربی سے شمال مشرقی سمت میں 10 تا 25 کلومیٹر فی گھنٹہ کی رفتار سے چلیں گی اور یہاں بھی ہواؤں کی رفتار 60 کلومیٹر فی گھنٹہ سے بڑھ سکتی ہے۔ لہریں آدھے میٹر سے ایک میٹر تک بلند ہوں گی اور شمالی و جنوبی حصوں میں دو میٹر سے بھی زیادہ ہو سکتی ہیں۔ سمندر کی حالت ہلکی سے تیز لہروں والی رہے گی اور ان حصوں میں گرج چمک کے ساتھ بارش کا امکان ہے۔