سعودی اساتذہ نے گزشتہ سال 72 سے زائد مقامی و عالمی ایوارڈز جیتے

وزیر تعلیم یوسف البنیان نے کہا ہے کہ گزشتہ سال 72 سے زائد اساتذہ اور معلمات نے مقامی اور بین الاقوامی ایوارڈز حاصل کیے۔

انہوں نے حکومتی پریس کانفرنس کے دوران مزید بتایا کہ مملکت کے طلبہ و طالبات نے بھی گزشتہ سال 400 سے زائد انعامات اور میڈل جیتے، جو اساتذہ میں سرمایہ کاری کا نتیجہ ہے جس کے مثبت اثرات طلبہ پر بھی پڑے ہیں۔

وزیر تعلیم نے یہ بھی کہا کہ وزارت نے ایک پلیٹ فارم تیار کیا ہے جس کے ذریعے پانچ لاکھ سے زائد تعلیمی شعبے کے ملازمین کو آن لائن پیشہ ورانہ ترقی کے مواقع فراہم کیے جا رہے ہیں۔

انہوں نے مزید کہا کہ معلم تعلیم کا بنیادی ستون ہے اور اساتذہ کے لیے پیشہ ورانہ تربیت کا منصوبہ تعلیمی نظام کے بڑے منصوبوں میں شامل ہے۔ اساتذہ کو انسانی صلاحیتوں کی ترقی کے پروگرام کے تحت تربیت دی جائے گی اور گزشتہ سال 60 ہزار اساتذہ کو تربیت فراہم کی گئی۔ اس کا مقصد مختلف تعلیمی مراحل میں تمام تعلیمی عملے کی پیشہ ورانہ ترقی ہے۔