جدہ میں چار افراد غیرقانونی سمندری سرگرمیوں پر گرفتار

جدہ میں ساحلی گشت پر مامور حرس الحدود نے چار شہریوں کو سمندری سرگرمیوں کے لیے مقررہ سکیورٹی اور حفاظتی ضوابط کی خلاف ورزی پر گرفتار کرلیا۔ یہ افراد بغیر اجازت نامہ ماہی گیری کر رہے تھے اور ممنوعہ آلات استعمال کر رہے تھے۔ ان کے خلاف متعلقہ اداروں کے ساتھ مل کر قانونی کارروائی کی گئی ہے۔

حرس الحدود نے عوام سے اپیل کی ہے کہ وہ آبی حیات کے تحفظ سے متعلق قوانین اور ہدایات کی پابندی کریں اور اگر کہیں ماحول یا جنگلی حیات کو نقصان پہنچانے کا کوئی واقعہ دیکھیں تو فوری طور پر اطلاع دیں۔ مکہ مکرمہ، مدینہ منورہ، ریاض اور مشرقی ریجن میں اس مقصد کے لیے 911 اور باقی علاقوں میں 994 پر رابطہ کیا جا سکتا ہے۔ تمام شکایات کو مکمل رازداری کے ساتھ نمٹایا جائے گا اور اطلاع دینے والے پر کوئی ذمہ داری عائد نہیں ہوگی۔