سعودی عرب کی کردستان عراق میں حملوں کی شدید مذمت

سعودی وزارت خارجہ نے کردستان عراق میں ہونے والے حملوں اور وزیراعظم مسرور بارزانی کے دفتر کو نشانہ بنانے کی شدید الفاظ میں مذمت کی ہے۔ وزارت نے اسے عراق کی خودمختاری اور اس کی سرزمین کی سالمیت کی کھلی خلاف ورزی قرار دیا۔

وزارت خارجہ نے منگل کو جاری بیان میں کہا کہ سعودی عرب ہر اس دشمنانہ کارروائی کو مکمل طور پر مسترد کرتا ہے جو اہم شخصیات یا سیاسی رہنماؤں کو نشانہ بنائے، یا عراقی ریاستی اداروں کے امن و استحکام کو متاثر کرے۔

سعودی وزارت خارجہ نے مزید کہا کہ سعودی عرب تمام ممالک کے داخلی معاملات میں مداخلت اور ان کی خودمختاری کی خلاف ورزی کی ہر شکل کو مسترد کرنے کے اپنے اصولی مؤقف کا اعادہ کرتا ہے، اور اچھے ہمسائیگی اور بین الاقوامی قوانین کے احترام کی اہمیت پر زور دیا۔