حوثی حملے میں بنگلہ دیشی داعی احرام میں شہید، سوشل میڈیا پر غم و غصہ

بنگلہ دیشی مفتی اور داعی نصر اللہ بدرپوری کے احرام میں ملبوس ہوکر مکہ مکرمہ روانگی سے قبل شہید ہونے کے واقعے نے اسلامی دنیا کی سوشل میڈیا پر شدید غم و غصے کی لہر دوڑا دی ہے۔

بدرپوری ریاض ایئرپورٹ پر حوثیوں کے حملے میں جاں بحق ہوئے، جس کے باعث وہ عمرہ کی سعادت حاصل کرنے کا خواب پورا نہ کرسکے۔

نصر اللہ بدرپوری 45 بنگلہ دیشی علما اور اساتذہ کے وفد کے ساتھ سعودی عرب پہنچے تھے۔ انہیں ریاض سے جدہ جانا تھا اور وہ جدہ جانے والی پرواز میں سوار ہونے سے چند منٹ قبل اس حملے کا نشانہ بنے۔

ادھر مرحوم کے والد مولانا محمد اللہ نے اپنے بیٹے کے عمرہ کی ادائیگی سے قبل اس طرح بچھڑ جانے پر گہرے رنج و غم کا اظہار کیا۔ یاد رہے کہ ریاض ایئرپورٹ پر اس حملے میں متعدد عمرہ زائرین جاں بحق اور زخمی ہوئے۔