سعودی شہری دفاع کی بارشوں اور سیلاب سے خبردار رہنے کی ہدایت

سعودی عرب کی جنرل ڈائریکٹوریٹ برائے شہری دفاع نے شہریوں اور مقیمین کو ہدایت کی ہے کہ وہ احتیاط برتیں اور سیلابی پانی یا وادیوں کے قریب جانے سے گریز کریں، کیونکہ پیر سے جمعہ تک مملکت کے بعض علاقوں میں گرج چمک کے ساتھ بارشوں کا سلسلہ جاری رہے گا۔

محکمے نے زور دیا ہے کہ لوگ محفوظ مقامات پر رہیں، وادیوں یا پانی جمع ہونے والی جگہوں میں نہ جائیں اور میڈیا و سوشل میڈیا کے ذریعے جاری کردہ ہدایات پر عمل کریں۔

متعدد علاقوں میں بارشوں کا اثر

شہری دفاع نے، نیشنل سینٹر فار میٹرولوجی کے حوالے سے بتایا کہ مکہ مکرمہ ریجن میں درمیانے سے شدید بارشیں متوقع ہیں، جو سیلابی ریلوں، ژالہ باری اور گرد و غبار کے جھکڑ کا سبب بن سکتی ہیں، خاص طور پر طائف، میسان، اضم اور العرضیات میں۔

محکمے کے مطابق جازان، عسیر اور الباحہ کے علاقوں میں بھی درمیانے سے شدید بارشیں ہوں گی، جن سے سیلابی ریلے، ژالہ باری اور گرد و غبار کے جھکڑ آ سکتے ہیں، جبکہ نجران ریجن میں ہلکی سے درمیانی بارشیں متوقع ہیں۔

اسی ضمن میں شہری دفاع نے عوامی سلامتی کے پیش نظر جاری کردہ انتباہات اور رہنما ہدایات پر عمل کرنے کی اہمیت پر بھی زور دیا ہے۔