نیواڈا کے شہر رینو سے ہزاروں افراد کا انخلا، جنگلاتی آگ قریب پہنچ گئی

امریکی حکام نے نیواڈا کے شہر رینو میں 42 ہزار سے زائد افراد کو ان کے گھروں سے نکال لیا ہے، کیونکہ تیزی سے پھیلنے والی جنگلاتی آگ، جسے 'ہوک فائر' کہا جا رہا ہے، شہر کے قریب پہنچ گئی ہے۔ یہ بات رینو کی میئر ہیلری شیو نے بتائی۔

شیو کے مطابق، حکام نے مزید 45 ہزار افراد کو کسی بھی وقت انخلا کے لیے تیار رہنے کی ہدایت کی ہے، کیونکہ آگ اب رینو سے صرف آٹھ کلومیٹر کے فاصلے پر ہے۔

آگ کا دائرہ وسیع، ایمرجنسی نافذ

آگ کی شدت بڑھ کر تقریباً 6,087 ہیکٹر تک پھیل چکی ہے، جس کے نتیجے میں کئی مکانات تباہ اور اب تک چھ افراد زخمی ہو چکے ہیں۔

دوسری جانب، نیواڈا کے گورنر نے واشو کاؤنٹی میں ایمرجنسی نافذ کر دی ہے اور خبردار کیا ہے کہ تیز ہواؤں کے باعث آگ تیزی سے پھیل سکتی ہے۔ انہوں نے شہریوں کو فوری انخلا کے لیے تیار رہنے کی ہدایت کی ہے تاکہ ان کی حفاظت یقینی بنائی جا سکے۔