خمیس مشیط اور ابہا میں خطرہ ٹل گیا، سول ڈیفنس کا اعلان

سعودی محکمہ سول ڈیفنس نے منگل کے روز اعلان کیا ہے کہ خمیس مشیط اور ابہا میں خطرہ ختم ہو چکا ہے۔ اس سے قبل ان دونوں شہروں میں ممکنہ خطرے کے پیش نظر انتباہ جاری کیا گیا تھا۔

سول ڈیفنس نے شہریوں پر زور دیا کہ وہ پُرسکون رہیں اور سرکاری ہدایات پر عمل کریں۔ اس کے ساتھ ساتھ عمارتوں کے اندر رہنے، کسی محفوظ داخلی کمرے یا ایسی جگہ جانے کی ہدایت کی گئی ہے جو کھڑکیوں سے دور ہو، اور خطرہ مکمل طور پر ختم ہونے تک گھر یا عمارت نہ چھوڑیں۔

ہدایت نامے میں مزید کہا گیا ہے کہ کھلی جگہوں اور شیشے کے قریب جانے سے گریز کریں، بالکونی یا چھت پر کھڑے نہ ہوں۔ جو لوگ عمارتوں سے باہر ہیں، انہیں قریب ترین عمارت میں داخل ہونے یا کسی مضبوط دیوار کے پیچھے پناہ لینے کا مشورہ دیا گیا ہے۔

محکمہ نے یہ بھی کہا ہے کہ ہجوم لگانے اور ویڈیو یا تصاویر بنانے سے مکمل طور پر اجتناب کریں اور خطرناک مقامات سے دور رہیں۔ اگر انتباہی پیغام ڈرائیونگ کے دوران موصول ہو تو گاڑی کو سڑک کے کنارے، پلوں اور بلند عمارتوں سے دور روک لیں۔