فلاي دبئی واقعے کے بعد پہلی اسرائیلی پرواز دبئی سے تل ابیب روانہ

اسرائیلی ایئرلائن آرکیا نے دبئی اور تل ابیب کے درمیان فضائی پروازیں دوبارہ شروع کر دی ہیں۔ جمعہ کی شام آرکیا کی پرواز IZ604 دبئی انٹرنیشنل ایئرپورٹ سے تل ابیب کے لیے روانہ ہوئی، جو فلاي دبئی کے ہنگامی لینڈنگ واقعے کے بعد اس نوعیت کی پہلی پرواز ہے۔

دبئی ایئرپورٹس کی ویب سائٹ کے مطابق آرکیا کی کم لاگت والی پرواز دبئی سے تل ابیب روانہ ہوئی، جبکہ فلاي دبئی نے اپنی پروازوں کو اس واقعے کی تحقیقات مکمل ہونے تک عارضی طور پر معطل کر رکھا ہے۔

یاد رہے کہ فلاي دبئی کی پرواز FZ1073 نے 30 ستمبر کو دبئی سے تل ابیب کے لیے اڑان بھری تھی، تاہم دوران پرواز پیش آنے والے واقعے کے باعث اس کا رخ سعودی عرب کے تبوک ایئرپورٹ کی جانب موڑ دیا گیا۔

فلاي دبئی کے چیف ایگزیکٹو غیث الغیث نے بتایا کہ طیارے میں موجود تمام 172 مسافر اور عملہ خیریت سے ہیں، اور پائلٹ کو طبی کلیئرنس ملنے کے بعد وہ متحدہ عرب امارات واپس پہنچ چکے ہیں۔

غیث الغیث نے مزید کہا کہ واقعے کی باضابطہ تحقیقات جاری ہیں اور اس حوالے سے مکمل چھان بین کی جا رہی ہے۔

فلاي دبئی نے متعلقہ حکام کی ہدایت پر تل ابیب کے لیے اپنی پروازیں تاحکم ثانی معطل کر دی ہیں، جبکہ متاثرہ مسافروں کو متبادل انتظامات اور ان کی منزل تک پہنچنے میں معاونت فراہم کی جا رہی ہے۔

آرکیا کی نئی پرواز ایسے وقت میں روانہ ہوئی ہے جب فلاي دبئی کے واقعے کی تحقیقات جاری ہیں اور کمپنی نے اس معاملے میں مکمل شفافیت کے عزم کا اظہار کیا ہے۔