ینبع میں ایمرجنسی الرٹ جاری، شہریوں کے لیے اہم ہدایات

سول ڈیفنس نے اعلان کیا ہے کہ ینبع میں ہنگامی حالات کے لیے قومی ابتدائی انتباہی پلیٹ فارم سے الرٹ جاری کر دیا گیا ہے تاکہ ممکنہ خطرے سے خبردار کیا جا سکے۔

سول ڈیفنس نے اپنے ایکس اکاؤنٹ پر شہریوں کو ہدایت کی ہے کہ وارننگ پیغام موصول ہونے پر درج ذیل اقدامات پر عمل کریں:

پرامن رہیں اور سرکاری ہدایات پر عمل کریں۔

فوری طور پر قریبی محفوظ جگہ یا عمارت کے اندرونی کمرے میں چلے جائیں اور ہجوم سے دور رہیں، جب تک خطرہ ٹل نہ جائے وہیں قیام کریں۔

خطرہ ختم ہونے تک گھر یا عمارت سے باہر نہ نکلیں، کھلی جگہوں اور شیشے کے قریب جانے سے گریز کریں اور بالکونی یا چھت پر کھڑے نہ ہوں۔

اگر آپ باہر ہیں تو قریبی عمارت میں داخل ہو جائیں یا مضبوط دیوار کے پیچھے پناہ لیں، ہجوم اور ویڈیو بنانے سے مکمل اجتناب کریں، اور اگر گاڑی میں ہیں تو سڑک کے کنارے، پلوں اور بلند عمارتوں سے دور رک جائیں۔

کسی بھی خطرے کی صورت میں مکہ مکرمہ، مدینہ منورہ، ریاض اور مشرقی ریجن میں ہنگامی نمبر (911) اور مملکت کے دیگر علاقوں میں (998) پر رابطہ کریں۔

متعلقہ اداروں کی جانب سے جاری ہونے والی ہدایات صرف سرکاری ذرائع سے حاصل کریں۔