سوشل انشورنس ادارے نے ویب سائٹ اور GOSI ایپ پر 7 نئی زبانیں شامل کردیں

سعودی سوشل انشورنس ادارے نے اعلان کیا ہے کہ اس نے اپنی ویب سائٹ اور GOSI ایپ میں سات نئی زبانیں شامل کردی ہیں۔ اس اقدام کا مقصد عربی اور انگریزی نہ بولنے والے صارفین کے لیے ڈیجیٹل خدمات سے استفادہ کو آسان بنانا ہے۔

نئی شامل کی گئی زبانوں میں اردو، بنگالی، فلپائنی، ہندی، سنہالی، نیپالی اور انڈونیشی شامل ہیں، جبکہ پہلے سے عربی اور انگریزی زبانیں دستیاب تھیں۔

ادارے کے مطابق، یہ ساتوں زبانیں GOSI ایپ کے لائٹ موڈ میں دستیاب ہیں، جبکہ ویب سائٹ پر فی الحال ان میں سے تین زبانیں فراہم کی گئی ہیں۔

اس اقدام کا مقصد ان زبانوں کے بولنے والے صارفین کے لیے خدمات کا حصول آسان بنانا، ان کے انشورنس حقوق و ذمہ داریوں سے آگاہی فراہم کرنا اور کلیمز، ورک انجرریز سمیت دیگر امور میں سہولت فراہم کرنا ہے۔

ادارہ اپنی ڈیجیٹل سروسز کو مسلسل بہتر بنانے اور صارفین کے تجربے کو مزید آسان و لچکدار بنانے کے لیے کوشاں ہے، تاکہ مختلف طبقات کے مستفیدین کو انشورنس خدمات ڈیجیٹل پلیٹ فارمز پر بآسانی میسر آئیں۔