ماحولیاتی قوانین کی خلاف ورزی پر عسیر اور شاہ عبدالعزیز ریزرو میں کارروائی

خصوصی فورس برائے ماحولیاتی تحفظ نے شاہ عبدالعزیز ریزرو اور عسیر ریجن میں ماحولیاتی قوانین کی خلاف ورزیوں کا سراغ لگا کر کارروائی کی ہے، جن میں ممنوعہ مقامات پر اونٹ چرانا اور مخصوص مقامات کے علاوہ آگ جلانا شامل ہے۔ خلاف ورزی کرنے والوں کے خلاف قانونی کارروائی عمل میں لائی گئی۔

شاہ عبدالعزیز ریزرو میں فورس نے ایک شہری کو اس وقت پکڑا جب اس نے ممنوعہ علاقے میں 80 اونٹ چرائے، جو کہ ریزرو کے ماحولیاتی تحفظ کے ضوابط کی خلاف ورزی ہے۔

فورس کے مطابق ممنوعہ مقامات پر اونٹ چرانے کی سزا ہر اونٹ پر 500 سعودی ریال مقرر ہے۔

اعرض التغريدة على منصة X

عسیر ریجن میں بھی ماحولیاتی فورس نے ایک اور شہری کو نباتاتی ماحول کے تحفظ کی ہدایات کی خلاف ورزی پر اس وقت پکڑا جب اس نے غیر مخصوص جگہ پر آگ جلائی۔ فورس نے اس کے خلاف بھی قانونی کارروائی کی تصدیق کی ہے۔

فورس کے مطابق جنگلات اور قومی پارکوں میں مخصوص مقامات کے علاوہ آگ جلانے کی سزا 3 ہزار سعودی ریال تک ہے۔

اعرض التغريدة على منصة X

ماحولیاتی فورس نے شہریوں اور مقیم افراد سے اپیل کی ہے کہ وہ ماحول یا جنگلی حیات پر کسی بھی قسم کے حملے کی اطلاع مکہ مکرمہ، مدینہ منورہ، ریاض اور مشرقی ریجن میں 911 اور دیگر علاقوں میں 999 یا 996 پر دیں۔

فورس نے یقین دہانی کرائی ہے کہ تمام شکایات کو مکمل رازداری کے ساتھ نمٹایا جائے گا اور اطلاع دینے والے پر کوئی ذمہ داری عائد نہیں ہوگی۔