غذائی و دوائی اتھارٹی کی ممنوعہ مادہ والی کافی و چاکلیٹ سے خبردار

سعودی جنرل اتھارٹی برائے غذا و دوا نے تین غذائی مصنوعات کے استعمال سے خبردار کیا ہے، جن میں لیبارٹری ٹیسٹ کے مطابق ممنوعہ مادہ (Nortadalafil) پایا گیا ہے۔

اتھارٹی کے مطابق متاثرہ مصنوعات میں بارسا کیفے برانڈ کی جینسنگ کافی، بارسا شوکو برانڈ کی جینسنگ ڈارک چاکلیٹ اور بنتان اسکائی برانڈ کی جینسنگ کافی شامل ہیں، جو تمام بیچز میں دستیاب ہیں۔ یہ مصنوعات 100 گرام کے پیکٹس میں فروخت کی جاتی ہیں۔

غذا و دوا اتھارٹی نے زور دیا ہے کہ مذکورہ مصنوعات ہرگز استعمال نہ کی جائیں اور فوری طور پر تلف کر دی جائیں، کیونکہ یہ خاص طور پر دائمی امراض میں مبتلا افراد کے لیے صحت کے مسائل پیدا کر سکتی ہیں۔

اتھارٹی نے مزید بتایا کہ ان مصنوعات کو مارکیٹ سے ہٹانے کے لیے قانونی کارروائی شروع کر دی گئی ہے اور وہ غذائی مصنوعات کی نگرانی اور صارفین کے تحفظ کے لیے اقدامات جاری رکھے گی۔

خلاف ورزی پر سخت کارروائی

اتھارٹی نے واضح کیا ہے کہ شہریوں اور مقیمین کی صحت سے متعلق کسی بھی خلاف ورزی پر کوئی رعایت نہیں برتی جائے گی اور درآمد کنندہ کمپنیوں کے خلاف قانونی کارروائی کی جائے گی۔ اتھارٹی نے بتایا کہ غذائی نظام اور اس کے ضوابط کی خلاف ورزی پر زیادہ سے زیادہ 10 سال قید، یا 1 کروڑ سعودی ریال تک جرمانہ، یا دونوں سزائیں دی جا سکتی ہیں۔

اسی تناظر میں اتھارٹی نے صارفین پر زور دیا ہے کہ وہ غذائی مصنوعات سے متعلق کسی بھی خلاف ورزی کی اطلاع یکساں کال سینٹر (19999) پر دیں، تاکہ نگرانی کو بہتر اور مصنوعات کی حفاظت کو یقینی بنایا جا سکے۔